1 Yinni Gusunɔ, wunɛ wi a ra tɔnu mɔru kɔsie, a wunɛn yiiko sɔ̃ɔsio. 2 Wunɛ handunian siri kowo, a seewo. A be ba tii sue ben kɔ̃sa kɔsieyo. 3 Sere saa yerà kaa n dera tɔn kɔ̃sobu ba n wãa. Sere saa yerà kaa n dera ba n nuku dobu mɔ. 4 Wee be ba ra n tɔmbu kɔ̃sa kuammɛ ba gari saarimɔ ka tii suabu. 5 Yinni Gusunɔ, ba wunɛn tɔmbu dam dɔremɔ be, be ba sãa wunɛn arumani. 6 Ba gɔminibu ka sɔbu goomɔ. Ma ba gobekuba sɛ̃remɔ ba goomɔ. 7 Ba mɔ̀, Yinni Gusunɔ kun sun mɛɛra. Gusunɔ Yakɔbun Yinni wi, kun bɛsɛn laakari mɔ̀. 8 Bɛɛ gari bakasu, i n tii sɛ. Sere saa yerà i ko i bwisi ko. 9 Gusunɔ wi u tɔnu swasu gira, wiya kun kpɛ̃ u gari nɔ? Wi, wi u tɔnu nɔni gira, wiya kun kpɛ̃ u yam wa? 10 Wi, wi u ra bwesenu sɛɛyasie, wiya kun tɔnu sɛɛyasiamɔ? Wi, wi u ra tɔnu yɛ̃ru wɛ̃, wiya kun bwisi mɔ? 11 Yinni Gusunɔ u tɔmbun bwisikunu yɛ̃. U yɛ̃ ma nu sãawa kam dirum. 12 Yinni Gusunɔ, doo nɔɔrugiiwa wi a sɛɛyasiamɔ. Doo nɔɔrugiiwa wi a seeya ka wunɛn wooda. 13 Wahalan saa sɔɔ, u ko n wãawa bɔri yɛndu sɔɔ sere bu ka tɔn kɔ̃so suura gbea. 14 Yinni Gusunɔ kun win tɔmbu derimɔ. U ǹ bu biru kisimɔ, be, be ba sãa win arumani. 15 Domi gemgiiwa u koo siribu di. Bèn gɔ̃ru ga dɛɛre kpa bu siri bi wura. 16 Wara u koo man sanna tɔn kɔ̃sobun mi. Wara u koo ka man yina kɔ̃san kowo ben nɔman di. 17 Yinni Gusunɔ ù kun daa man somi, na n daa wãa gɔribun wãa yerɔ. 18 Yinni Gusunɔ, nà n bãarimɔ, wunɛn duroma mu ra de na n tãsa. 19 Bwisiku dabinu nù n wãa nɛn gɔ̃ruɔ, a ra man nukuru yɛmiasie. Kpa na n nuku dobu mɔ. 20 Yinni Gusunɔ, mba n bɛɛ mɔɔsinɛ wunɛ ka siri kowo tɔn gowo be ba ra n wunɛn woodaba gɛma ba n tɔmbu dam dɔremɔ, 21 kpa ba n nɔɔ tia mɔ̀ bu ka gemgibu wɔri. Kpa ba n taarɛ sarirugibu taarɛ wɛ̃ɛmɔ. 22 Adama Yinni Gusunɔ, wuna a sãa nɛn gbãra damgiru. A sãawa nɛn kpee baa yèn mi na ra kuke. 23 Kaa de ben toranu nu wɔri ben wiru wɔllɔ. Kaa de ben tiin nuku kɔ̃suru tu bu marisia. Gusunɔ nɛn Yinni, kaa bu nɔɔ marisia.
