1 Wunɛ wi Wɔrukoo u kɔ̃su, a wɛ̃rewa Dam kpurogiin tɔbuɔ. 2 Kon Yinni Gusunɔ sɔ̃ ma wiya nɛn kuku yeru ka nɛn kàrì. Wiya nɛn Yinni wi na naanɛ sãa. 3 Domi wiya u nun wɔramɔ saa taan di. Wiya maa nun wɔramɔ saa kɛ̃si kɛ̃si gɔɔ ka win wahalan di. 4 U koo nun win sansu wukiri. Kaa kuku yeru wa win kasan sɔɔwɔ. Win bɔrɔkinira sãawa nge tɛrɛru ka tarakpe. 5 Wɔ̃kurun kari ǹ kun mɛ sɛ̃u ge ga wee sɔ̃ɔ sɔɔ, yen gaa kun nun bɛrum mɔ̀. 6 Kɛ̃si kɛ̃si gɔɔ wi u bɔsu wɔ̃kuru, ǹ kun mɛ bara te ta tɔmbu goomɔ sɔ̃ɔ sɔɔ gbãara, yen gaa kun nun bɛrum mɔ̀. 7 Baa bara ni, nù n tɔmbu nɔrɔbu (1.000) go wunɛn bɔkuɔ, ma nu tɔmbu nɔrɔbun suba wɔkuru (10.000) wɔri wunɛn nɔm geuɔ, gãanu kun nun babamɔ. 8 Nɔniya kaa ka mɛɛri tɔna kpa a tɔn kɔ̃sobun are wa. 9 Yèn sɔ̃ Yinni Gusunɔ u kua wunɛn kuku yeru, ma wi, Wɔrukoo u kua wunɛn wãa yeru, 10 yen sɔ̃na nɔni swãaru gara kun nun sisie, bararu gara kun maa wunɛn yɛnu susiɔ. 11 Domi u koo win gɔradoba nɔɔ kɛ̃ wunɛn sɔ̃, ba n nun kɔ̃su wunɛn swɛɛ kpuro sɔɔ, 12 bu nun nɛnɛ ka ben nɔma kpa a ku ra ka wunɛn naasu kperu sokura. 13 Kaa gbee sunɔ ka surɔkɔru yɔ a sara, kpa a gbee sunɔ kpɛmu ka yaa gɔba tem taare. 14 Yinni Gusunɔ u nɛɛ, yèn sɔ̃ u man kĩ, kon nùn yakia kpa n nùn kɔ̃su domi u nɛn yĩsiru yɛ̃. 15 Ù n man soka kon nùn wurari. Ko na n wãa ka wi nɔni swãarun saa. Kon nùn yakia kpa n nùn bɛɛrɛ wɛ̃. 16 Kon de u tɔkɔru ko bɔri yɛndu sɔɔ, kpa n nùn nɛn faaba sɔ̃ɔsi.
