Womusu 90

1Mɔwisi Gusunɔn sɔm kowo u kanaru kua u nɛɛ, Yinni, saa yellun di, wuna a sãa bɛsɛn kuku yeru. 2A sãawa Gusunɔ a sere guunu ka handunia taka kua. Mɛya kaa n maa sãa sere ka baadommaɔ. 3A ra de tɔnu u gɔsira tua. A ra nùn sɔ̃ a nɛɛ, u gɔsiro min di, u we. 4Wunɛn mi, wɔ̃ɔ nɔrɔbu (1.000) ra n sãawa nge gĩan tɔ̃ru te ta doona kɔ, ǹ kun mɛ nge wɔ̃kurun sãkiru. 5A ra tɔnun wãaru nɔru koosiewa nge mɛ dosu ga ra doonɛ bururu. Ga ku ra tɛ nge yakasu 6sìn wɛ̃su ra n baare bururu, ǹ n kua yoka bu su bura kpa su gbera. 7Wunɛn mɔru ya dera sa gɔɔ dɔɔ. Ma sa nanda yen saabu. 8A ra bɛsɛn toranu terasiewa wunɛn wuswaaɔ, kpa wunɛn yam bururam mu bɛsɛn asiri kpuro sɔ̃ɔsi. 9Bɛsɛn wãaru ta ra doonɛwa wunɛn mɔrun sɔ̃. Ta ra doonɛwa nge wɛ̃sia teeru. 10Tɔnun wãaru ta ra turi sere wɔ̃ɔ wata ka wɔkuru, wi u maa dam mɔ, wɔ̃ɔ wɛnɛ, adama ka mɛ, tɔnun wãara ku ra n arufaani gaa mɔ sere wahala ka nɔni swãaru. Domi ta ra doonɛwa fuuku gɔri gia. 11Wara u wunɛn mɔrun dam yɛ̃. Wara u nun nasie yen sɔ̃. 12A de sa n yɛ̃ ma bɛsɛn wãarun tɔ̃ra kun dɛ̃u, kpa su ko bwisigibu. 13Yinni Gusunɔ, sere domma kaa gɔ̃ru gɔsia a wunɛn mɔru deri. A bɛsɛ wunɛn sɔm kowobun wɔnwɔndu waawo. 14A sun wunɛn durom bakam sɔ̃ɔsio bururu baatere. Kpa sa n nuku dobu mɔ sa n womusu mɔ̀ bɛsɛn wãarun tɔ̃ru kpuro sɔɔ. 15A sun nuku dobu wɛ̃ɛyɔ nge mɛ̀n nɔɔ a sun sɛɛyasia. Kpa a bɛsɛn nuku sankira ten wɔ̃su gɔsia nuku dobun wɔ̃su. 16A de su wunɛn sɔma wa bɛsɛ wunɛn sɔm kowobu, kpa a bɛsɛn bibun bweseru wunɛn yiiko sɔ̃ɔsi. 17Gusunɔ bɛsɛn Yinni, a sun durom kuo, kpa a de bɛsɛn sɔma kpuro yu arufaani ko.

will be added

X\