1 Womu ge Koren bibu ba wom kowobun wirugii kua. Ba gu kuawa ka guuru. Hemani Esirahigiiwa u gu kua. Ge wee. 2 Yinni Gusunɔ nɛn faaba koowo, na ra n nɔɔgiru suewa wunɛn wuswaaɔ wɔ̃kuru ka sɔ̃ɔ sɔɔ. 3 A de a nɛn kanaru nɔ. A swaa tem kpĩiyɔ a nɔ ye na nun kanamɔ. 4 Wee wahala ya man deema n kpã sere na gɔribun wãa yeru turuku kua. 5 Na wãa be ba gɔɔ dɔɔn wuurɔ. Na ǹ maa dam mɔ. 6 Wee na kpĩ ka gɔribu sannu. A dera na wãa ka be sannu sikirɔ, be, be a ǹ maa yaayamɔ, a ǹ maa bu nɔɔrimɔ. 7 A man kpɛ̃ɛ wɔru bɔkɔ sɔɔ mi yam wɔ̃kura wãa. 8 A man mɔru seesi, ma n sãare na nim mwɛɛre. 9 A dera nɛn kpaasibu ba man deri. A dera ba man tusa, ma na taarere na ǹ kpɛ̃ n nunda nɛn wahalan di. 10 Nɛn nɔni dam dwiiya nɔni swãarun sɔ̃. Yinni Gusunɔ, tɔ̃ru baatere na ra nɔma yiiyewa wunɛn mi gia na n nun somiru kanamɔ. 11 Gɔriba a ra maamaaki kue? Gɔriba ba koo kpĩ bu se bu nun sã? 12 Gɔriba ba koo kpĩ bu wunɛn bɔrɔkinirun gari gere siki wɔruɔ? Ba koo kpĩ bu wunɛn tɔn geerun gari gere gɔribun wãa yerɔ? 13 Ba koo kpĩ bu wunɛn maamaaki wa yam wɔ̃kurɔ? Ba koo kpĩ bu wunɛn gem tubu gɔriɔ mi ba ra tɔmbu duari? 14 Yinni Gusunɔ, wuna na ra faaba kanɛ. Bururu baatere, wuna na ra nɔɔgiru sue. 15 Yinni Gusunɔ, mban sɔ̃na a man wunɛn wuswaa berue. Mban sɔ̃na a ǹ kĩ n nun wa. 16 Saa nɛn birun di, na wɔnwɔndu soorewa na gɔɔ dɔɔ. Na burisinɛ nɔni swãa te a man kpɛ̃ɛn sɔ̃. 17 Nɛ sɔɔra wunɛn mɔru ya wɔri, ma ya man goomɔ. 18 Ya ka man sikerenɛ tɔ̃ɔ baatere nge nim bweru. Ye kpurowa ya man wukiri. 19 A dera nɛn kpaasibu ka nɛn bɔrɔba ba man biru kisi. Be kpuro ba man deri.
