Womusu 86

1Dafidi u kanaru kua u nɛɛ, Yinni Gusunɔ, a man swaa dakio kpa a nɛn kanaru nɔ. Wee na sãaru ka wɔnwɔndu soore. 2A nɛn hunde beruo, domi na ra nun sã. Gusunɔ, na nun naanɛ sãa, a man faaba koowo. 3Yinni, wuna na ra nɔɔgiru sue baadomma. A man wɔnwɔndu kuo. 4Yinni, a man nuku dobu wɛ̃ɛyɔ. Wuna na ra n kanamɔ ka nɛn gɔ̃ru kpuro. 5Yinni, a sãawa tɔn geo, a ra maa tɔmbu ben durum wɔke. A ra be ba nun soku kpuro kĩru sɔ̃ɔsi ta n kpã. 6Yinni Gusunɔ, a nɛn kanaru nɔɔwɔ. A nɛn weeweenu swaa dakio. 7Domi nà n nun kana nɔni swãarun saa, a ra man wisi. 8Gãanu sari ni nu ka nun weenɛ ye ba ra sã kpuro sɔɔ. Gãanu maa sari ni nu ka wunɛn sɔma weenɛ. 9Bwese ni a taka kua kpuro nu koo na nu yiira wunɛn wuswaaɔ, kpa nu wunɛn yĩsiru bɛɛrɛ wɛ̃. 10Domi a kpã, a ra maa sɔm maamaakiginu ko. Wunɛ turowa a sãa Gusunɔ. 11Yinni Gusunɔ, a man wunɛn swɛɛ sɔ̃ɔsio, kpa n wa n sĩ wunɛn gem sɔɔ. A de n wunɛn yĩsiru nasia. 12Gusunɔ nɛn Yinni, kon nun siara ka nɛn gɔ̃ru kpuro, kpa n nun bɛɛrɛ wɛ̃ sere ka baadommaɔ. 13Domi a man durom bakam kua, a man yara gɔribun wãa yerun sɔɔ sɔɔn di. 14Yinni Gusunɔ, tii suobu ba man seesi. Tɔn kɔ̃sobu ba kĩ bu man hunde wuna, be, bèn bwisikunu ku ra n wãa wunɛn mi gia. 15Adama wunɛ Gusunɔ, a sãawa Yinni wɔnwɔndugii. A ku ra mɔru se fuuku. Wunɛn kĩru ta kpã. A maa sãawa bɔrɔkini. 16A man mɛɛrima kpa a nɛn wɔnwɔndu wa. A nɛ, wunɛn sɔm kowo dam kɛ̃ɛyɔ, kpa a man faaba ko nɛ, wunɛn sɔm kowon bii. 17Yinni Gusunɔ, a man yĩreru sɔ̃ɔsio te ta koo man koora, kpa a de nɛn yibɛrɛba bu ye wa kpa sekuru tu bu mwa. Domi wuna a ra man faaba ko, kpa a man nukuru yɛmiasia.

will be added

X\