Womusu 85

1Womu ge Koren bibu ba wom kowobun wirugii kua. Ge wee. 2Yinni Gusunɔ, a wunɛn tem durom kua. Wee a ka bɛsɛ Isireli be sa sãa Yakɔbun bweseru wurama. 3A bɛsɛ wunɛn tɔmbun toranu wɔka. A bɛsɛn durum kpuro wukiri. 4A ǹ maa ka sun mɔru sãa. A dera wunɛn mɔru kpuro ya sure. 5Gusunɔ bɛsɛn faaba kowo, a sun wesio nge yellu. A ku maa ka sun mɔru ko. 6Nge kaa n ka sun mɔru sãawa sere ka baadommaɔ? Nge kaa n mɔru sãawa sere ka bɛsɛn bibun bibu sɔɔ? 7A ǹ sun wãaru wesiamɔ kpa bɛsɛ wunɛn tɔmbu su wa su nuku dobu ko wunɛn sɔ̃? 8Yinni Gusunɔ, a sun wunɛn durom sɔ̃ɔsio kpa a sun faaba ko. 9Yinni Gusunɔ, kon swaa daki n nɔ ye a gerumɔ. Domi bɔri yɛndun gariya a ra n wunɛn tɔmbu sɔ̃ɔmɔ be ba nun naanɛ sãa ma ba kun wure wiira gari sɔɔ. 10Be ba nun nasiewa a ra faaba ko. Kpa a de bɛɛrɛ ya n wãa bɛsɛn tem sɔɔ. 11Tɔn geeru ka bɔrɔkinira koo wurama kpa gem ka bɔri yɛnda n wãa tem mɛ sɔɔ. 12Bɔrɔkiniru ta koo se tem mɛ sɔɔ nge dĩa bwese te ba duura, kpa gem mu sarama wɔllun di. 13Yinni Gusunɔn tiiwa u koo sun bɔri yɛndu wɛ̃, kpa bɛsɛn tem mu binu ma. 14Gema mu ko n nùn gbiiye, kpa mu win swaa sɔmɛ.

will be added

X\