Womusu 84

1Womu ge Koren bibu ba wom kowobun wirugii kua. Ba gu kuawa ka mɔrɔku. Ge wee. 2Gusunɔ, wɔllu ka tem Yinni, wunɛn wãa yeru ta man wɛ̃re. 3Na sɛnde, na diirimɔ n wa n ka du wunɛn sãa yerɔ. Nɛn gɔ̃ru ka nɛn wasi kpuro nuku dobun kuuki mɔ̀ wunɛ Yinni Gusunɔn sɔ̃, wunɛ wi a wãa. 4Nɛn Yinni, nɛn sina boko! Baa ka gunɔminɔ nu ra n wãa yeru mɔ. Wɔllu ka tem Yinni, a ra mam de nu sokunu ko wunɛn yãku yerun bɔkuɔ. 5Doo nɔɔrugiba be ba wãa wunɛn sãa yerɔ ba nun tɔmamɔ baadomma. 6Doo nɔɔrugiba be ba tãsa wunɛ sɔɔ. Ba ra n sɔɔru sãa bu ka sãaru da. 7Bà n sarɔ wɔwan di ye ba mɔ̀ Yĩresu, a ra de bwii yi koorawa mi, kpa gura yu ka ye domaru naawa. 8Nge mɛ ba dɔɔ bu ka Gusunɔ yinnibun Yinni sã Siɔniɔ, nge mɛya ben dam mu ra n sosimɔ gbabu te sɔɔ. 9Gusunɔ wɔllu ka tem Yinni, a man swaa dakio. Gusunɔ Yakɔbun Yinni, a nɛn kanaru nɔɔwɔ. 10Yinni, wunɛ wi a sãa bɛsɛn tɛrɛru, a wi a gɔsan wuswaa mɛɛrio. 11Nɛn sɔ̃ɔ teerun wãaru wunɛn sãa yerɔ, ta nɛn yam tukum wãarun sɔ̃ɔ dabi dabinu kere. N buram bo na n wãa wunɛn sãa yerun kɔnnɔwɔ, ye ko na n ka wãa diru mi tɔn kɔ̃soba wãa. 12Yinni Gusunɔ, a sãawa nge sɔ̃ɔ. A maa sãawa nge tɛrɛru. Wuna a ra tɔmbu durom ka bɛɛrɛ kue. Be ba sĩimɔ gem sɔɔ, a ku ra ka bu gea yinari. 13Gusunɔ, wɔllu ka tem Yinni, doo nɔɔrugiiwa wi u nun naanɛ sãa.

will be added

X\