1 Womu ge Asafu u kua. U nɛɛ, 2 Gusunɔ, a ku mari, a ku maa wɛ̃ra. 3 Domi wee wunɛn yibɛrɛba ba seewa, be, be ba nun tusa ba wiru yɔ̃rasie. 4 Wee ba kɔ̃sa wesianamɔ wunɛn tɔmbun sɔ̃. Ba nɔɔ tia mɔ̀ be a kɔ̃sun sɔ̃. 5 Ba gerumɔ ba mɔ̀, bu na bu sun kpeerasia bwesenu kpuron suunu sɔɔn di, kpa bu ku maa bɛsɛ Isireliban yĩsiru yaaya. 6 Wee ba wesiana, ma be kpuro ba nɔɔ tia kua bu ka nun wɔri. 7 Beya, Edɔmuba ka Isimɛɛliba ka Mɔabuba ka Agariba 8 ka Gebaliba ka Amɔniba ka Amalɛkiba ka Filisitiba ka sere Tirigibu. 9 Asirigibun tii ba na ba ka bu nɔɔ tia kua, ba Lɔtun bibun bweseru, Amɔniba ka Mɔabuba nɔma kã. 10 Yinni Gusunɔ, a bu kuo nge mɛ ba Sisera ka Yabini ka Madianiba kua Kisionin daarɔ. 11 Ba bu kpeerasiawa Eni Doriɔ, ma ba ben gonu deri mi, nu tem kɔ̃sisia nge naa bisu. 12 A de ben sinambu bu gbi nge sinam beni, Orɛbu ka Seebu ka Seba ka Salumuna, 13 be, be ba raa geruna ba nɛɛ, bu da bu Gusunɔn arumani gura. 14 Yinni Gusunɔ, a bu suo a ka doona nge mɛ woo guna ya ra ka yakasu doonɛ. 15 A de bu dɔ̃ɔ mwaara nge mɛ dɔ̃ɔ u ra dãa sɔ̃ɔ mwɛ, ǹ kun mɛ nge mɛ dɔ̃ɔ yara ya ra guunu dabiri. 16 A bu naa giro ka guru woo bɔkɔ. A bu nandasio ka woo guna. 17 Yinni Gusunɔ, a bu sekuru dokeo, kpa bu wa bu gɔsirama wunɛn mi. 18 A de bu sekuru wa, kpa ba n nande sere ka baadommaɔ. A ben yĩiyɔbu wunɔ, kpa bu kam ko. 19 Kpa bu gia ma wunɛ turowa a sãa Yinni Wɔrukoo handunia ye sɔɔ.
