Womusu 81

1Womu ge Asafu u wom kowobun wirugii kua ka mɔrɔku. Ge wee. 2Yinni Gusunɔwa u sãa bɛsɛn dam. I nùn womu kuo ka nuku dobu. I Gusunɔ Yakɔbun Yinni takaru koowo ka nuku dobu. 3I womusu koowo. I gãasu ka mɔrɔkunu ka gɔ̃ɔgenu soowo. 4I kɔba soowo suru kpaon tɔ̃ɔ bakaru sɔɔ. I kɔba wureo Kunun tɔ̃ɔ bakaru sɔɔ suru ù n tarum kua. 5Domi wooda yera Yakɔbun Yinni u Isireliba wɛ̃. 6Wooda yera u Yosɛfun yɛnugibu wɛ̃ sanam mɛ u Egibiti wɔri. Ma na nɔɔ gagu nua ge na ǹ tuba. Ga nɛɛ, 7na bɛɛ sɔmunu swɛnya bɛɛn senun di, na dera i yoo sɔma deri. 8Sanam mɛ i wãa nɔni swãaru sɔɔ, i man soka, ma na bɛɛ yakia. Na bɛɛ wisa guru maakinu sɔɔ. Na bɛɛn laakari mɛɛra Mɛriban bwiaɔ. 9Bɛɛ nɛn tɔmbu Isireliba, i man swaa dakio i nɔ ye kon bɛɛ sɔ̃. 10I ku de bũu goo u n maa wãa bɛɛn suunu sɔɔ. I ku maa nu yiira i sã. 11Nɛna Gusunɔ bɛɛn Yinni wi u bɛɛ yara Egibitin di. I bɛɛn nɔɔ wukio kpa n bɛɛ diisia. 12Adama bɛɛ nɛn tɔmbu, i ǹ man swaa daki, i ǹ maa man mɛm nɔɔwɛ. 13Na dera i wɔri bɛɛn gɔ̃ru bɔbunu sɔɔ, ma i bɛɛn tiin bwisi swĩi. 14Bɛɛ nɛn tɔmbu, ì n daa man swaa daki i sĩimɔ nɛn swaa sɔɔ, 15kon daa bɛɛn yibɛrɛba sekuru doke, kpa n bu naa swĩi n go go. 16Saa ye sɔɔra nɛ, Yinni Gusunɔn yibɛrɛban tii suabu koo nɔru ko, kpa Isireliban doo nɔɔru tu tɛ. 17Kon bu dĩa geenu wɛ̃, kpa bu kperun tim gem di.

will be added

X\