1 Womu ge Asafu u kua. Ge wee. Gusunɔ, wee tɔn tukobu ba wunɛn tem wɔri. Ba dera wunɛn sãa yeru ta disi duura. Ba dera Yerusalɛmu ya kua bansu. 2 Ba wunɛn tɔmbu go, ma ba dera gunɔsu ben gonu di. Ba dera gbeeku yɛɛ yi be, be ba nun sãamɔ min gonu tema. 3 Ba ben yɛm yari mu ka Yerusalɛmu sikerenɛ nge nim, ma ba ben gonu deri mi, goo kun nu sikua. 4 Be ba ka sun sikerenɛ ba sun wɔmmɔ. Bɛsɛn berusebu ba sun yaakoru mɔ̀. 5 Yinni Gusunɔ, sere saa yerà wunɛn mɔru ko n seewa. Sere saa yerà kaa n nisinu seewa nge dɔ̃ɔ. 6 A de wunɛn mɔru yu wɔri bwese ni nu ǹ nun yɛ̃ ka ni nu ǹ nun sãamɔ sɔɔ. 7 Domi ba Isireliba go, ma ben tem mu kua bansu. 8 A ku sun bɛsɛn sikadoban durum sɔbi. Adama wunɛn kĩrun sɔ̃, a sun wɔnwɔndu kuo. Domi sa kua wɔnwɔndobu. 9 Gusunɔ bɛsɛn faaba kowo, a sun somiɔ kpa wunɛn yĩsiru tu bɛɛrɛ wa. A sun wɔro kpa a sun bɛsɛn durum wɔka. 10 Mban sɔ̃na kaa de bwesenu nu n mɔ̀, mana bɛsɛn Yinni u wãa. A be ba wunɛn tɔmbun yɛm yari mɔru kɔsieyo bwesenun suunu sɔɔ bɛsɛn wuswaaɔ. 11 Yinni Gusunɔ, a dɛsobun weeweenu nɔɔwɔ, kpa a be ba ka dɔɔ bu go faaba ko ka wunɛn dam. 12 Yinni, bwese ni nu ka nun sikerenɛ nu nun wɔnwa, a nu nin durum kɔsieyo sere nɔn nɔɔba yiru. 13 Adama bɛsɛ wunɛn tɔn be a kpare, sa ko nun tɔma sere ka baadommaɔ, kpa bɛsɛ ka bɛsɛn bibun bweseru sa n nun bɛɛrɛ wɛ̃ɛmɔ.
