Womusu 77

1Asafun womu ge u Yedutum kua. Ge wee. 2Na Gusunɔ nɔɔgiru sue. Na nùn soku, u koo man swaa daki. 3Nà n nuki sankire, na ra Gusunɔ kasuwa. Wɔ̃kuru na ku ra wɛ̃re. Na ra nɛn nɔma yiiyewa wɔllɔ nà n kanaru mɔ̀. Adama ka mɛ, nɛn bwɛ̃ra ku ra kpunɛ. 4Nà n Gusunɔ yaaya, na ra n weeweenu mɔ̀wa. Nà n bwisika, nɛn gɔma ya ra dwiiyewa. 5Yinni Gusunɔ u ku ra de n dweeya. Na ku ra kpĩ n gari gere nɛn nɔni swãarun sɔ̃. 6Na ra yellu yaayewa kpa na n gasɔn gari bwisikumɔ. 7Na nɛn womusu yaayamɔ wɔ̃kuru, ma na bwisikumɔ na mɔ̀, 8Yinni Gusunɔ u koo sun yinawa sere ka baadommaɔ? U ǹ maa ka sun nɔnu geu mɛɛrimɔ? 9Win durom mu kpawa mi sere ka baadommaɔ? U ǹ maa gari gɛɛ mɔ u sun sɔ̃ sere ka baadommaɔ? 10U duariwa u sun durom kua? U sun win wɔnwɔndu wunariwa win mɔrun sɔ̃? 11Ma na nɛn tii sɔ̃ɔwa na nɛɛ, wee ye ya man dumɔ, yera Wɔrukoon dam kun maa ka sun wãa. 12Yinni Gusunɔ, kon wunɛn sɔma yaaya. Domi na yaaya sɔm maamaakigii ni a kua. 13Kon wunɛn sɔma kpuron gari kpara. Kon sɔm maamaakiginun gari saari. 14Gusunɔ, wunɛn swɛɛ yi dɛɛrewa. Wara u ka nun kpãaru nɛ. 15A sãawa wi u ra sɔm maamaakiginu ko. A dera wunɛn dam mu sɔ̃ɔsira bwesenu sɔɔ. 16Ka wunɛn dama a wunɛn tɔmbu yakia be, be ba sãa Yakɔbu ka Yosɛfun sikadominu. 17Gusunɔ, ye nim mu nun wa, ma mu diira, mu gbisa sere sɔɔwɔ. 18Ma gura nɛmɔ nge daa surundu. Ma guru gbãsukubu nɔɔramɔ. Ma guru maakinu daamɔ wɔllun baama. 19Gura ya gbãra ma guru maakinu nu handunia kpuro yam bururasia, ma tem mu diira bɛrum sɔ̃. 20A sĩa nim wɔ̃kun wɔllɔ ka maa mɛn sɔɔwɔ. Adama goo kun wunɛn yira wa. 21A dera Mɔwisi ka Aroni ba wunɛn tɔmbu kpara nge yãa gɔ̃ɔ.

will be added

X\