Womusu 74

1Womu ge Asafu u kua. Ge wee. Gusunɔ, mban sɔ̃na a sun yina. Mban sɔ̃na a ka sun mɔru mɔ̀ bɛsɛ be a kpare nge yãa gɔ̃ɔ. 2A bɛsɛ wunɛn tɔmbu yaayo, bɛsɛ be a yakia saa yellun di. A bɛsɛn bwese kɛri yaayo yi yi kua wunɛgii. A Siɔnin guu te yaayo tèn mi wunɛn wãa yera raa wãa. 3A doo a wa nge mɛ yam mi, n bansu kua mam mam. Yibɛrɛba ba gãanu kpuro sanka sãa yee te sɔɔ. 4Wunɛn yibɛrɛba ba kukura sãa yeru mi nge gbee sinansu ma ba ben gidi bɔra gira mi. 5Ba sãare nge dãa buro be ba gbãa yiiyamɔ dãa sɔ̃ɔwɔ. 6Ma ba sãa yee ten bura yãnu kpuro kɔsuka ka gbɛ̃ɛ ka matalaka. 7Ba wunɛn sãa yee te dɔ̃ɔ mɛni. Ba tu disi doke te, te ta wunɛn yĩsiru sɔɔwa. 8Ma ba gerumɔ ben gɔ̃ruɔ ba mɔ̀, su bu nɔni sɔ̃ ka dam. Ma ba bɛsɛn sãa yenu kpuro dɔ̃ɔ mɛni tem mɛ sɔɔ. 9Yinni, sa ǹ maa yĩreru garu waamɔ te ta sun sɔ̃ɔsimɔ ma a wãa bɛsɛn suunu sɔɔ. Wunɛn sɔmɔbu ba ǹ maa wãa. Bɛsɛn goo kun maa yɛ̃ sere saa yerà kaa n sun deri mɛ. 10Sere saa yerà kaa n mara yibɛrɛ u n nun nɔɔ kuurimɔ. Sere saa yerà kaa n nɔɔ maari yibɛrɛ u n wunɛn yĩsiru kam mɛɛra. 11Mban sɔ̃na a wunɛn nɔmu kurua. A gu dɛmiɔ kpa a bu kam koosia. 12Gusunɔ, saa yellun di wuna a sãa nɛn sunɔ. Wuna a sun faaba kua nɔn dabinu. 13Wuna a nim wɔ̃ku burana ka wunɛn dam ma a yɛɛ gɔbi wiru kɔsuka. 14Wuna a karaku wiru kɔra, ma a dera be ba wãa mi gãanu ku ra kpi ba gu tema. 15A dera bwia ka daara yara, ma a daanu gberasia ni nu ku ra nim kpe. 16Wuna a wɔ̃kuru ka sɔ̃ɔ sɔɔ kua. Wuna a yam bururam ka sɔ̃ɔ kua. 17Ma a tem nɔɔ bura yenu kua. Ma a yam susuru ka puran saaba yi. 18Yinni Gusunɔ, a yaayo ma yibɛrɛ u nun yɛ̃ɛmɔ. Bwese te ta ǹ bwisi mɔ, ta wunɛn yĩsiru gɛma. 19A ku wunɛn tɔn be a kĩ mi gbeeku yɛɛ deria. A ku bu duari be, be ba sãa wɔnwɔndobu. 20A wunɛn arukawani yaayo. Domi dam diobu ba yiba ba kukua mi ba ǹ bu wasi tem mɛ sɔɔ. 21A ku de wi ba dam dɔre u sekuru wa. A de wɔnwɔndo ka sãaro bu nun siara. 22Yinni Gusunɔ, a seewo a ka tii yina. A yaayo wɔma ye gari bakasu ra n nun mɔ̀. 23A ku wunɛn yibɛrɛban wɔkinu duari. A be ba nun seesimɔ baadomman wɔkinu nɔɔwɔ.

will be added

X\