Womusu 73

1Womu ge Asafu u kua. Ge wee. Geema, Gusunɔ u sãawa tɔn geo Isireliban sɔ̃ ka maa bèn gɔ̃rusu dɛɛre. 2Na raa wɔrumaa dɔɔ, n tie fiiko n ka tem turi. 3Domi na raa ka gari bakasu nisinu kua yèn sɔ̃ na waamɔ tɔn kɔ̃sobu ba nuku dobu mɔ̀. 4Gãanu ganu kun bu nɔni sɔ̃ɔmɔ ben wãarun tɔ̃ru kpuro sɔɔ. Mɛya ben wasi yi bwãa do ma yi ballimɔ. 5Ba ǹ dunian wãarun wahala gaa yɛ̃. Mɛya ba ǹ maa yɛ̃ nɔni swãa te tɔn be ba tie ba ka wãa. 6Ba tii suabu sebua nge saba ye ba ra sebe wĩirɔ. Ma ba daa bɔɔbɔya sebua nge yaberu. 7Ben nuku kɔ̃surun kom mu yarimɔ saa ben nukurun di, ma ben gɔ̃run bwisikunu nu sɔ̃ɔsiramɔ tɔɔwɔ. 8Ba ra n tɔnu yɛ̃ɛmɔwa ba n mɔ̀, ba koo nùn dam dɔre ka nuku kɔ̃suru. Kpa ba n tii sua gari gerumɔ, 9ba n Gusunɔ wɔllu wɔmmɔ. Mɛya maa ben yara ku ra goo deri handunia mi. 10Yen sɔ̃na tɔmbu kpuro ba wuramɔ ben mi gia. Ma ba ben gari nɔrumɔ nge nim, 11ba mɔ̀, Gusunɔ kun gãanu yɛ̃. Wi, Wɔrukoo, u ǹ yɛ̃ru mɔ. 12Nge mɛya tɔn kɔ̃sobun wãara sãa. Ba ku ra n wurure. Ba ra n ben dukia kuurasiamɔwa. 13Ma na tii sɔ̃ɔwa na nɛɛ, ǹ n mɛn na, kam sɔɔra na nɛn gɔ̃ru dɛɛrasia, ma na nia n ka sɔ̃ɔsi ma na dɛɛre. 14Yinni, tɔ̃ru baatere a ra man sɛɛyasiewa, kpa a man nɔni sɔ̃ bururu baatere. 15Nà n nɛɛ, kon ko nge tɔn kɔ̃so be, ko na n kĩ n nɛn bweseru siki te a gɔsa. 16Ye na gari yin asansi kasu n ka yi tubu, ma na wa yi man sɛ̃sie too. 17Adama dɔma te na dua wunɛ Gusunɔn sãa yerɔ, saa yera na gia ye ya tɔn kɔ̃sobu mara. 18Geema, Yinni Gusunɔ, a bu surewa swaa yè sɔɔ ba koo sɛlla, kpa bu wɔruma bu gbi. 19Kaa de bu kam ko mii mii, kpa ben wãaru tu nɔru ko subaru sɔɔ. 20Yinni, a ra bu kpeerasiewa, kpa bu ben gari duari nge mɛ tɔnu u ra dosu duari. 21Ye nɛn gɔ̃ru ga sankira, n sãawa nge gãanu sɔka nɛn nukurɔ. 22Ma na kua nge gari bɔkɔ, na ǹ gãanu tuba nge gbeeku yaa. 23Adama ka mɛ, na wãa ka wunɛ. Ma a man mwa ka wunɛn nɔm geu. 24Kaa man kpara ka wunɛn bwisi. Yen biru, kaa man mwa wunɛn yiiko sɔɔ. 25Wara na mɔ wɔllɔ, wunɛ baasi. Mɛya na ǹ maa goo yĩiyɔ handunia yeni sɔɔ. 26Nɛn wasi ka nɛn bwisikunu kpuro koo doona. Adama wunɛ Yinni Gusunɔ, wuna a ra man dam kɛ̃. A sãawa nɛn dukia sere ka baadommaɔ. 27Wee be ba ka nun tonda ba gbimɔ. Mɛya a be ba nun deri go. 28Adama nɛ, n man wɛ̃re na n wãa wunɛn bɔkuɔ Yinni Gusunɔ. Domi na kuku yee naanɛgiru wa wunɛ sɔɔ. Kon kpara ye a man kua kpuro.

will be added

X\