Womusu 72

1Womu ge Salomɔɔ u kua. Ge wee. Gusunɔ, a nɛ sina boko bwisi kɛ̃ɛyɔ n ka siri nge mɛ a ra siri, 2kpa n wunɛn tɔmbu siri gem sɔɔ baa be ba sãa sãarobu. 3Wunɛn gem sɔ̃, ben gungunu ka ben guunu nu koo bu arumani wɛ̃. 4Kon sãarobu siria kpa n bu ben gem wɛ̃, kpa n bwɛ̃ɛbwɛ̃ɛbun bibu faaba ko, n be ba bu dam dɔremɔ kɔsuku. 5Mɛ̀n nɔɔ sɔ̃ɔ ka suru yarimɔ, mɛya ba ko n maa nun nasie sere ka baadommaɔ. 6Yinni Gusunɔ, a de nɛ, sina boko na n arufaani mɔ nge gura ye ya nɛmɔ gbee te ba kɔrɔ kua sɔɔ, ǹ kun mɛ nge nim arufaanigum mɛ mu kokumɔ gberɔ, 7kpa nɛn bandu sɔɔ gem mu n wãa, kpa dukia yu kuura mɛ̀n nɔɔ suru yarimɔ. 8A de na n bandu dii saa nim wɔ̃ku ge ba mɔ̀ Mɛditeranɛn di sere n ka girari nim wɔ̃ku bɔruguuɔ, saa maa daa te ba mɔ̀ Efaratin di sere handunian nɔrɔ. 9Kpa a maa de be ba wãa gbaburɔ kpuro bu na nɛn wuswaaɔ bu man yiira, kpa nɛn yibɛrɛba bu tua nɔ. 10Taasisi ka tem mɛ mu toman sinambu ba koo ka man gbere gobi naawa. Seba ka Saban sinambu ba koo ka man kɛ̃nu naawa. 11Kpa sinambu kpuro bu man yiira, kpa bwesenu kpuro nu man sã. 12Domi kon sãaro wi u weeweenu mɔ̀ wɔra, kpa n bwɛ̃ɛbwɛ̃ɛ wi u kun goo mɔ somi. 13Mɛya na kon maa sãaron wɔnwɔndu wa, kpa n bwɛ̃ɛbwɛ̃ɛn wãaru wɔra. 14Kon bu wɔra be ba bu dam dɔremɔn min di. Kon bu yakia be ba bu nɔni sɔ̃ɔmɔn nɔman di. Domi ben wãaru ta sãawa gãa girinu nɛn nɔni sɔɔ. 15Kpa nɛ sina bokon wãaru tu dakaa da, kpa bu ka man Saban wura naawa. Ba ko n da man kanaru kue tɔ̃ɔ baatere ba n man domaru kuammɛ. 16Kpa alikama yu marura tem sɔɔ ka guunɔ. Kpa yen winu nu n wom sooramɔ nge Libanin dãnu. Mɛya maa tɔmba koo marura wusu sɔɔ nge yaka bii. 17Kpa nɛ sina bokon yĩsiru ta n yara sere ka baadommaɔ, ba n tu soku mɛ̀n nɔɔ sɔ̃ɔ yarimɔ. Tɔmbu bà n ben winsim domaru kuammɛ, ba n da nɛn yĩsiru soku, kpa bwesenu kpuro nu nɛɛ, doo nɔɔrugiiwa nɛ sina boko. 18Su Gusunɔ Isireliban Yinni siara. Domi wi turowa u ra sɔm maamaakiginu ko. 19Su nùn siara win yĩsi bɛɛrɛgii ten sɔ̃. Win yiiko yu sɔ̃ɔsira handunia kpuro sɔɔ. Ami! Ami! 20Womu geniwa Dafidi Isain bii u ka win kananu wiru go.

will be added

X\