1 Yinni Gusunɔ, wunɛn miya na kuku yeru kasu. A ku de n sekuru wa baa fiiko. 2 Wunɛ wi a ra siri dee dee, a man wɔro kpa a man faaba ko. A man swaa dakio, kpa a man somi. 3 A de a n sãa nɛn kpee baa mi kon kuke. Kpa na n wãa mi baadomma. Wuna a gɔ̃ru doke a man faaba ko. Domi a sãawa nɛn kuku yeru nge kpee baa damgia. 4 Gusunɔ nɛn Yinni, a man wɔro tɔn kɔ̃sobun nɔman di ka nuku kɔ̃surugibun nɔman di. 5 Domi wunɛ sɔɔra na yĩiyɔbu mɔ. Saa nɛn piiburun di, wuna na naanɛ sãa. 6 Saa dɔma tèn di ba man mara, wunɛ sɔɔra nɛn naanɛ ya wãa. Wuna a maa man yara nɛn mɛron nukurun di. Wuna ko na n siaramɔ baadomma. 7 Tɔn dabiru tà n man wa, biti ra bu mwɛwa. Adama wunɛ, a kua nɛn kuku yee damgiru. 8 Yinni Gusunɔ, a de na n nun siaramɔ baadomma. A de na n nun bɛɛrɛ wɛ̃ɛmɔ tɔ̃ɔ baatere. 9 A ku man deri nɛn tɔkɔru sɔɔ. A de a n ka man wãa baa nà n dam dwiiya. 10 Domi nɛn yibɛrɛba ba nɛn gari mɔ̀. Be ba kasu bu man go, ba nɔɔ tia mɔ̀. 11 Ba gerumɔ ba mɔ̀, wee a man deri. Ba koo man naa swĩiwa bu mwa. Domi na ǹ goo mɔ u man wɔra. 12 Ǹ n mɛn na, Gusunɔ nɛn Yinni, a ku man deri. A na fuuku a man somi. 13 A de be ba kasu bu man go mi, bu burisina bu kam ko. A de be ba nɛn kam kobu kĩ bu sekuru wa. 14 Adama nɛ, wuna na yĩiyɔ. Na kon nun siaramɔwa na n dɔɔ. 15 Kpa n wunɛn gem ka wunɛn faaban gari kpara tɔ̃ɔ baatere. Domi ya ǹ nɔru mɔ. 16 Yinni Gusunɔ, kon wunɛn sɔm damginun gari gere. Wunɛ turon gem gariya kon kpara. 17 Gusunɔ, wuna a man keu koosia saa nɛn birun di. Yen sɔ̃na sere ka tɛ̃ na wunɛn sɔm geenun gari kparamɔ. 18 Gusunɔ, a ku man deri baa nà n tɔkɔ kua, kpa n kpĩ n ka tɛ̃n aluwaasiba ka be ba koo ra marura wunɛn dam gari sɔ̃. 19 Wunɛn gem mu wãawa sere ka wɔllɔ. Gusunɔ, gãa bakana a kua. Wara u ka nun weenɛ. 20 Wuna a dera sa wahala ka nuku sankiranu wa. Adama kaa na a sun wãaru wɛ̃, kpa a sun yara saa siki wɔrun di. 21 A man nukuru yɛmiasio kpa a de n nun bɛɛrɛ wɛ̃. 22 Yinni, kon nun tɔma ka mɔrɔku, kpa n nun siara ka womusu wunɛn bɔrɔkinirun sɔ̃. Kon wunɛn yĩsiru wɔlle sua ka mɔrɔku, wunɛ wi a sãa Isireliban Yinni Dɛɛro. 23 Nà n nun siaramɔ, ba koo nɛn nuku dobu wa nɛn wuswaan di. Mɛya maa nɛn hunde ye a wɔra ya koo nun takaru ko. 24 Mɛya maa nɛn yara ya ko n wunɛn gari kparamɔ saa baayere. Be ba kasu bu man go, ba burisina ba sekuru wa.
