Womusu 7

1Womu ge Dafidi u kua sanam mɛ u nuki sankire Kusi Bɛnyamɛɛgiin sɔ̃. Ge wee. 2Gusunɔ nɛn Yinni, wuna na naanɛ sãa. A man wɔro be ba man naa giren nɔman di. 3Kpa bu ku raa man mwa bu kasuku nge mɛ gbee sunɔ ga ra yaa kasuku, goo u kun ye wɔre. 4- 5Gusunɔ, nɛn Yinni, wee ba man taarɛ wɛ̃ɛmɔ ba mɔ̀, na goo torari, na nɛn kĩnasi bɔrɔ kɔ̃ɔru kua, na nɛn yibɛrɛ wɔri, na win yãnu wɔra ka wɔbia. Adama nà n yen gaa kuan na ka gem, 6a de nɛn yibɛrɛ u man sɛ̃re u go. A de u nɛn goru deri mi. 7Yinni Gusunɔ, a nɛn yibɛrɛ wɔrio ka mɔru. Be ba kɔ̃rua, a bu sɛɛyasio ka mɔru. A de a n wãa nɛn bɔkuɔ. A de a man siria. 8Yinni Gusunɔ, wee a sɔ̃ wunɛn sina gɔnaɔ. A de bwesenu nu mɛnnama mi. A de a nu siri mi. 9Yinni Gusunɔ, wuna kaa tɔmbu siri. A man sirio nge mɛ nɛn dɛɛrara nɛ. A man nɛn gem wɛ̃ɛyɔ. 10A de tɔn kɔ̃sobun daa yu nɔru ko, kpa a de gemgibu bu kuura. Yinni Gusunɔ, a sãawa gemgii. Wuna a ra tɔnun gɔ̃run gari wɛ̃ɛri. 11Wuna a ra man ganɛ nge tɛrɛru. Wuna a ra bèn gɔ̃ru ga dɛɛre faaba ko. 12Wunɛ, a ra siriwa dee dee. Yinni Gusunɔ, a maa sɛ̃. 13Ka mɛ, tɔn kɔ̃so u ku ra win daa deri. U ra win takobi nɔɔ dɛrewa. U ra win tɛndu bɛriwa. U win sɛ̃u sɔre u yĩisi. 14U tabu yãa gɔɔginu kua. Ma u sɛ̃ɛ dɔ̃ɔginu kua. 15U win sɔmburu seewa. U kɔ̃sa bwisikumɔ. U weesu wĩimɔ. 16U suura gba gabun sɔ̃, adama win tiiwa u koo ye wɔri. 17Kɔ̃sa ye u raa kua kpuro, win wirɔwa ya koo wɔri. Win damgii te u raa dɔramɔ, win wira ta koo kɔra. 18Yinni Gusunɔ, kon nun siara, domi a sãa naanɛgii. Yinni Wɔrukoo, kon nun tɔma ka womu.

will be added

X\