Womusu 69

1Womu ge Dafidi u wom kowobun wirugii kua. Ge wee. 2Gusunɔ, a man faaba koowo. Na sãare na nim mwɛɛre wahalan sɔ̃. 3Na nummɔ yironu sɔɔ, na ǹ kpɛ̃ n yɔ̃ra. Na wɔri nim bwerɔ ma nim tora ka man doonɔ. 4Na swĩ na wasira sere nɛn gɔ̃ru ga gbera. Nɛn nɔni dam dwiiya ye na wunɛn somiru mara. 5Be ba man tusa ba ǹ ten wiru ka naasu yɛ̃, ba dabi ba nɛn wirun seri kere. Nɛn yibɛrɛ be ba kĩ bu man go kam ba dam mɔ. Ye na ǹ gbɛnɛ, ba kĩ n yen kɔsire wɛ̃. 6Gusunɔ, a nɛn asansi sariru yɛ̃. Nɛn toranu nu ǹ maa berua wunɛn mi. 7Gusunɔ, wɔllu ka tem Yinni, a ku de be ba nun yĩiyɔ bu sekuru wa nɛn sɔ̃. Isireliban Yinni, a ku de be ba nun kasu bu sekuru di nɛn sɔ̃. 8Domi wunɛn sɔ̃na na seku bakaru sɔɔwa ta dera na nɛn wuswaa wukiri. 9Nɛn mɛro bisibu ba man mɛɛra tuko. Nɛn mɛro turosibu ba ǹ man yɛ̃. 10Wunɛn dirun kĩra man mɛnimɔ nge dɔ̃ɔ. Be ba nun wɔmmɔ, ben wɔma wɔri nɛ sɔɔ. 11Sanam mɛ na tii kawa na nɔɔ bɔkua, ba man funɛ wuna. 12Sanam mɛ na saaki sebua nuku sankiranun sɔ̃, ba man yaakoru mɔ̀. 13Be ba sɔ̃ gbãra kɔnnɔwɔ ba man wĩimɔ. Tam nɔrobu ba ka nɛn yĩsiru womu mɔ̀. 14Adama Yinni Gusunɔ, wuna nɛ, na kanamɔ. Gusunɔ, a man wurario wunɛn durom bakam sɔ̃ saa ye a kĩ. Domi a ra tɔnu faaba ko ka gem. 15Kpa a man yara yironun di n ku ka kpam num. A man wɔro nɛn yibɛrɛban nɔman di ka nim bwerun di. 16A ku de nim yiburu tu man wukiri, kpa nim bweru tu man di. A ku de wɔru bɔkɔ gu man kɔrusi. 17Yinni Gusunɔ, a man wurario wunɛn tɔn geerun sɔ̃. Wunɛn wɔnwɔn bakaru sɔɔ, a man sĩirema. 18A ku nɛ wunɛn sɔm kowo biru kisi. A man wurario fuuku, wee na wãa nuku sankira bakanu sɔɔ. 19A susima a nɛn hunde wɔra. A man faaba koowo nɛn yibɛrɛban nɔman di. 20A yɛ̃ nge mɛ ba man funɛ wuna. Ba man sekuru doke, ba man kam mɛɛra. A maa nɛn yibɛrɛba kpuro yɛ̃. 21Sekura man nuki sanka sere na kom yaa bie. Na mara goo u man wɔnwɔndu kua, adama sari. Na kasu wi u koo man nukuru yɛmiasia, na ǹ wa baa turo. 22Sanam mɛ gɔ̃ɔra man mɔ̀, ba dɛ̃ɛ doke nɛn dĩanu sɔɔ. Sanam mɛ nim nɔru ga man mɔ̀, tam mɔmmɔma ba man wɛ̃ n nɔ. 23A de ben tɔ̃ɔ baka dim mu ko yina sanam mɛ ba sɔ̃ sɛ̃ɛ ka bɔri yɛndu. 24A ben nɔni wukirio bu ku maa ka yam wa, kpa ben dam mu dwiiya. 25A bu wunɛn mɔru seesio, kpa wunɛn mɔru baka ye, yu bu deema. 26A de ben wãa yenu nu ko bansu. Kpa goo u kun maa wãa ben kuu bekunuginu sɔɔ. 27Domi wi a soomɔ, wiya ba nɔni sɔ̃ɔmɔ. Wi a maa yaasa sɔka a mɛɛra kua, ba win nuku sankiranu sosimɔ. 28A ben toranu kpuro yaayo. A ku bu wɔnwɔndu kua baa fiiko. 29A ben yĩsinu goowo wãarun tirenun di, kpa a ku bu mɛnna ka gemgibu. 30Adama na wãa nuku sankiranu ka wahala sɔɔ. Gusunɔ, a de wunɛn somiru tu man yara. 31Kon Gusunɔ siara ka womusu. Kon takaru ko n nùn wɔlle sua. 32Yeya ya ra Yinni Gusunɔ wɛ̃re n kere naa kinɛ yeburu. 33Be ba gɛma, bà n yeni wa, ba ko n nuku dobu mɔ. Bɛɛ be i Gusunɔ kasu, i ko n gɔ̃ru dobu mɔ bɛɛn wãaru sɔɔ. 34Domi Yinni Gusunɔ u ra sãarobun gari nɔ. U ku ra wigibu duari be ba wãa dɛsiru sɔɔ. 35Wɔllu ka tem ka nim wɔ̃ku ka kpuro ye ya wasi mi sɔɔ, yu nùn tɔmɔ. 36Gusunɔ u koo Siɔni faaba ko. U koo maa Yudan wusu bani. Win sɔm kowobu ba koo sina wuu si sɔɔ kpa su ko begisu. 37Ben bibun bwesera koo tem mɛ tubi di. Be ba Gusunɔ kĩ, ba ko n ben wãa yeru mɔ mi.

will be added

X\