Womusu 68

1Womu ge Dafidi u wom kowobun wirugii kua. Ge wee. 2Gusunɔ, a seewa ma wunɛn yibɛrɛba ba yarina. Wunɛn wɛrɔbu ba duki sua wunɛn wuswaan di. 3A bu yarinasia nge wiisu. Ma ba yanda nge gum minɛru te ba dɔ̃ɔ tĩi. Tɔn kɔ̃sobu ba munda wunɛn wuswaaɔ Gusunɔ. 4Adama gemgibu ba ra n nuku dobu ka nasara mɔwa wunɛn mi kpa ba n yɛ̃ɛrimɔ. 5I Gusunɔn yĩsiru wɔlle suo ka womusu. I nùn swaa kuo, u gbaburu mɔ̀, u guru winu sɔni u wee. Win yĩsira Yinni Gusunɔ. I nuku dobu koowo win wuswaaɔ. 6Yinni Gusunɔ, wuna a sãa gobekuban baaba ka gɔminibun kɔ̃so. A wãa wunɛn wãa yee dɛɛrarɔ. 7Wuna a ra be tɔmba yina yɛnu wɛ̃, kpa a yobu yakia, a bu nuku dobu wɛ̃. Adama kaa mɛm nɔɔ sariba deriwa mi gãanu sari. 8Gusunɔ, sanam mɛ a wunɛn tɔmbu swaa gbiiye gbaburɔ, 9tem mu yĩira, ma wɔlla wukiara ka dam wunɛn wuswaaɔ. Ma Sinain guura diira wunɛ Isireliban Yinnin wuswaaɔ. 10A dera guri barukagia ya na, ma wunɛn tem sɔɔ wãara wurama. 11Mɛ sɔɔra wunɛn tɔmba ben wãa yeru kua, mɛ, mɛ a sɔɔru kua ka kĩru wɔnwɔndobun sɔ̃. 12Yinni Gusunɔ, a wooda wɛ̃, ma tɔn kurɔ sɔmɔ dabiru ba ye kpara. 13Yibɛrɛban tabu sinamba yakikiramɔ, ma ben kurɔbu ba ben yãnu bɔnu mɔ̀ ni ba deri. 14N sãare kparukonun kasi yi sii geesu sɔɔwa ma nin sansu wura mɔnsi, ma i sere da i kpĩ yãa gɔ̃sɔ? 15Sanam mɛ Dam kpurogii wi, u sinam be yarinasia, tem mu burura guu te ba mɔ̀ Salumɔniɔ. 16Basanin guunu nu sãawa guu bakanu. Nin gungunu maa dabi. 17Bɛɛ guu ni i gunguu dabinu mɔ, mban sɔ̃na i ka Gusunɔn guu te u gɔsa nisinu mɔ̀. I n yɛ̃ ma miya u koo win wãa yeru ko sere ka baadommaɔ. 18Yinni Gusunɔ, a tabu kɛkɛ dabinu mɔ, ma a sĩimɔ yen nɔrɔm nɔrɔm ka yen nɔrɔm nɔrɔm suba yɛndun suunu sɔɔ. Wunɛn yiiko ye ya sɔ̃ɔsira Sinaiɔ ya wura wunɛn sãa yerɔ. 19Yinni Gusunɔ, a yɔɔwa guurun wɔllɔ, ma a tɔmbu yoru mwɛɛra. Ma ba nun kɛ̃nu kã, ka mam be ba nun seesimɔn tii. 20Gusunɔ u ra sun nɔɔri. Wiya u sãa bɛsɛn faaba kowo. Yen sɔ̃, sa ko nùn siara tɔ̃ɔ baatere. 21Wiya u ra tɔnu faaba ko. Wi turowa u koo kpĩ u nùn yakia saa gɔɔn di. 22Wiya u koo win yibɛrɛban wiru kɔra. Kpa u be ba wãa durum sɔɔn wii suunu yabe. 23Wiya u nɛɛ, u koo ka bu na saa Basanin di, kpa u bu yarama saa nim wɔ̃ku sɔɔn di, 24kpa su bɛsɛn naasu kpɛ̃ɛ ben yɛm sɔɔ, kpa bɛsɛn bɔ̃nu nu ben gonu tem. 25Gusunɔ nɛn Yinni, nɛn sina boko, ba wunɛn sanum waamɔ wunɛn sãa yee dɛɛrarɔ. 26Wom kowoba ba swaa gbia, ma be ba baranu ka mɔrɔkunu soomɔ ba bu swĩi, ba wãa wɔndia be ba baranu soomɔn suunu sɔɔ. 27I Yinni Gusunɔ siaro mi tɔmba mɛnna. Bɛɛ Isireliban bweseru, i nùn wɔlle suo. 28Bɛnyamɛɛ wi u piiburu bo, win bwesera ta bu swaa gbiiye, ma Yudan bwese kɛran wirugibu ka ben tɔmbu ba bu swĩi. Yen biru, Sabulonin bwese kɛra ka Nɛfitaligian wirugibu ba bu swĩi. 29Gusunɔ u wooda wɛ̃ bu nùn ko damgii. Gusunɔ, a ye a sun kua dam sireo. 30Sinamba koo ka nun kɛ̃nu naawa wunɛn sãa yerɔ te ta Yerusalɛmun dia kpuro gunum kere. 31Yinni Gusunɔ, a Egibiti yam swĩɛyɔ, ye ya nun sãamɔ ka sii geesu, ye, ye ya sãa nge karaku ge ga wãa daarun bɔkuɔ, ǹ kun mɛ nge naa kinɛ ni nu wãa gɔ̃sɔ, ye, ye ya bwesenu dam dɔremɔ. A be ba ra n tabu kĩ yarinasio. 32Damgiba wee saa Egibitin di. Ma Etiopigiba duki mɔ̀ ba nɔma sue Gusunɔn mi gia. 33Handunian sinambu, i Yinni Gusunɔ siaro ka womusu. I nùn wɔlle suo. 34I nùn siaro ka womusu wi, wi u sĩimɔ wɔllɔ te ta wãa saa yellun di. Wee win nɔɔ damguu ga nɔɔra. 35I Gusunɔ bɛɛrɛ wɛ̃ɛyɔ. Win yiiko ya wãawa Isireliba sɔɔ. Ma win dam mu wãa wɔllɔ. 36Gusunɔ, a nanum mɔ wunɛn sãa yerɔ. Wunɛ Isireliban Yinni, a ra wunɛn tɔmbu dam wɛ̃. Gusunɔ, sa nun siara.

will be added

X\