Womusu 66

1Womu ge ba wom kowobun wirugii kua. Ge wee. Bɛɛ handunian tɔmbu kpuro, i Gusunɔ nɔɔgiru sueyo ka nuku dobu. 2I womu koowo win yĩsirun yiikon sɔ̃. I win yĩsiru wɔlle suo ka womusu, 3kpa i nùn sɔ̃ ma win sɔma ya nanum mɔ, domi win dam mu kpã. Yen sɔ̃na win yibɛrɛba ba nùn wiru kpĩiyammɛ. 4Handuniagibu kpuro ba nùn yiirammɛ. Ba nùn tɔmamɔ ka womusu, ma ba win yĩsiru bɛɛrɛ wɛ̃ɛmɔ. 5I na i Gusunɔn sɔma mɛɛri ye u kua. U nanum mɔ ù n sɔmburu mɔ̀ tɔmbun suunu sɔɔ. 6U dera daara gbera, ma sa tɔbura bɛsɛn naasu kun nim wa, ma sa nuku dobu kua wi sɔɔ. 7U bandu diiwa sere ka baadommaɔ win dam saabu. U bwesenu kpuro mɛɛra ka laakari, kpa mɛm nɔɔ sariba bu ku raa nùn seesi. 8I Gusunɔ siaro bɛɛ bwesenu kpuro. I nùn tɔmɔ bu nɔ baama. 9Domi u bɛsɛn wãaru wɔra. U ǹ dere su sokura. 10Gusunɔ, a sun doke laakari mɛɛribu sɔɔ. A dera sa wãa dɔ̃ɔ sɔɔ nge sii geesu. 11A sun kpɛ̃ɛ yina sɔɔ ma a sun sɔmu bakanu sɔbi. 12A dera bɛsɛn yibɛrɛba ba sun sɔni, ma sa dɔ̃ɔ ka nim sara. Adama a sun yara min di sa n ka bɔri yɛndu mɔ. 13Kon du wunɛn sãa yerɔ n ka nun yãkuru kua, kpa n nɛn nɔɔ mwɛɛnu yibia 14ni na nun kua nɛn wahalan saa sɔɔ. 15Kon ka nun kɛtɛba ka bonu yãkuru kua, kpa n ka nun yãa ni nu gum mɔ yãku dɔ̃ɔ mwaararuginu kua. 16Bɛɛ be i Gusunɔ nasie, i na i nɔ, kpa n bɛɛ sɔ̃ ye u man kua. 17Na nùn nɔɔgiru sue u man somi, ma na nùn siara ka womusu. 18Nà n daa toraru garu mɔ nɛn gɔ̃ruɔ, Yinni Gusunɔ kun daa man wurarimɔ. 19Adama u nɛn kanaru swaa daki u man wurari. 20Na nùn siara domi u nɛn kanaru mwa. Ma u ǹ man win durom wunari.

will be added

X\