Womusu 65

1Womu ge Dafidi u wom kowobun wirugii kua. Ge wee. 2Yinni Gusunɔ, sa ko nun siara ka naanɛ dokebu Siɔniɔ, kpa su nɔɔ mwɛɛ ni sa nun kua yibia. 3Yinni Gusunɔ, wunɛ wi a ra tɔmbun kanaru nɔ, tɔmbu kpuro ba koo na wunɛn mi. 4Bɛsɛn toranu sun buniɛ. Wuna kaa sun nu suuru kua. 5Doo nɔɔrugiiwa wi a gɔsa u nun susi u wãa wunɛn sãa yerɔ. Wunɛn wãa yerun nuku dobu koo de su debu wunɛn sãa yee dɛɛrarɔ. 6Gusunɔ bɛsɛn faaba kowo, wunɛn kĩrun saabu, a ra bɛsɛn kanaru wure, kpa a sun sɔm maamaakiginu sɔ̃ɔsi. Wuna tɔmbu kpuro ba naanɛ sãa temɔ sere ka be ba wãa nim wɔ̃kun tem burenɔ. 7Wuna a dam mɔ. Ka dam mɛya a ka guunu swĩi nin ayenɔ. 8Wuna a ra nim wɔ̃kun wɔkinu marisie, kpa a gen nim kurenu yɔ̃rasia. Mɛya a ra maa tɔmbun wurenu kpeesie. 9Handunian goonu nnɛ sɔɔ, tɔmbu kpuro ba wunɛn sɔm maamaakiginu nasie. Wunɛ wi a ra sɔ̃ɔ yari yerugibu ka sɔ̃ɔ duu yerugibu nuku dobu wɛ̃. 10Wuna a ra tem nɔɔri, kpa a mu nim yɛ̃ka mu n kpã. A ra maa de mu n dukia mɔ. Gusunɔ, wunɛn bwia ya nim yibawa. Mɛya a ra ka tem dwiiyasie, kpa dĩanu nu wa nu ka kpi. 11A ra gberun kpĩin tem kusanu kɔsuku kpa a nu nim yɛ̃ka. A ra maa de gura yu nu dwiiyasia mam mam, kpa a ye ba duura mi domaru kua yu ka kpi. 12A ra dewa wɔ̃ɔ gu tore kpa gu kpe ka wunɛn durom, kpa debura n wãa mi a sara kpuro. 13Debu te, ta wãawa ka kpara yenɔ, ma nuku dobu nɔɔramɔ guunɔ. 14Ma yãanu tɛrie kpara yenu mi. Mɛya alikama ya kpia ya wɔwa wukiri, ma baayere kpuro ya nun takaru mɔ̀, ya womu mɔ̀ ka nuku dobu.

will be added

X\