Womusu 64

1Womu ge Dafidi u wom kowobun wirugii kua. Ge wee. 2Gusunɔ, a nɛn nɔɔ nɔɔwɔ sanam mɛ na weeweenu mɔ̀. A man kɔ̃suo nɛn yibɛrɛ wi na nasien sɔ̃. 3A man yaro tɔn kɔ̃sobun wesianɔsun di. Kpa a man yara daa kɔ̃sagibun suunun di. 4Ba ben yara nɔɔ deramɔ nge takobi, kpa ba n gari kɔ̃si kasukumɔ nge sɛ̃ɛnu, 5bu ka wi u kun gãanu kue to asiri sɔɔ. 6Ba tii dam kɛ̃mɔwa kɔ̃san kobu sɔɔ. Ba ra nɔɔ tia ko bu ka tɔmbu yina bɛria ba n mɔ̀, goo kun bu wasi. 7Kɔ̃sa ba himba mɔ̀ ba mɔ̀, ben kpunaa ye, ya wãwa mam mam. Domi goo kun kpɛ̃ u tɔnun gɔ̃run gari tubu. 8Gusunɔ u bu sɛ̃ɛnu twee. Wee nu bu girari. 9U bu mwa ka ben tii tiin gari. Be ba bu wa kpuro ba ra wii gimanu kowa. 10Kpa bɛrum mu be kpuro mwa ba n kparamɔ ye Gusunɔ u kua, kpa ba n yen bwisikunu mɔ̀. 11Yinni Gusunɔn miya gemgii u ra kuku yeru ka nuku dobu wa. Kpa bèn gɔ̃ru ga dɛɛre bu bɛɛrɛ wa win mi.

will be added

X\