1 Womu ge Dafidi u Yedutum ka wom kowobun wirugii kua. Ge wee. 2 Ka geema, Gusunɔ wunɛ sɔɔra nɛn naanɛ wãa. Wuna a ra man faaba ko. 3 Wuna a maa sãa nɛn kperu tèn mi na ra kuke n ka faaba wa. Wuna a sãa nɛn kuku yee bakaru. A ǹ derimɔ nɛn naasu su sokura. 4 Sere saa yerà i ko i n tɔnu kunisi i n sɛ̃re, nge mɛ ba ra gana ye ya dɛbura sure, ǹ kun mɛ kara ye ya wɔrumaa dɔɔ. 5 Geema, ba nɔɔ tia mɔ̀ bu ka durɔ wi sura win aye bakarun di. Ba ku ra n weesu mɛɛra gãanu ben mi. Ka nɔɔwa ba ra n tɔnu domaru kuammɛ, gɔ̃ruɔ kpa ba n nùn bɔ̃rusimɔ. 6 Gusunɔ, wunɛ sɔɔra nɛn naanɛ wãa. Wunɛ sɔɔra nɛn yĩiyɔbu wãa. 7 Wuna a sãa nɛn kperu tèn mi kon kuke n ka faaba wa. Wuna a sãa nɛn kuku yee bakaru. Nɛn naasu kun maa sokuramɔ. 8 Gusunɔ, wuna a ra man faaba ko, kpa a de na n bɛɛrɛ mɔ. Wuna nɛn kuku yee damgiru. 9 Bɛɛ tɔmbu, i nùn naanɛ koowo saa kpuro. I nùn sɔ̃ɔwɔ ye ya bɛɛ nɛni. Domi wiya u sãa bɛsɛn kuku yeru. 10 Tɔnu u sãawa wom dirum. Mɛya u maa sãa weesu. Bà n nùn kilo sɔndi, kaa deema u ǹ woo bunum tura. 11 I ku bɛɛn naanɛ doke daa bɔɔbɔya sɔɔ. I ku maa bɛɛn yĩiyɔbu doke wɔbia sɔɔ. Bɛɛn dukia yà n kuuramɔ, i ku bɛɛn bwɛ̃ra kpuro doke ye sɔɔ. 12 N ǹ nɔn teeru na Gusunɔn gere yeni nua ye u nɛɛ, wiya u dam mɔ. 13 Yinni Gusunɔ, wuna a durom mɔ. A ra baawure kɔsiewa ye u kua.
