Womusu 61

1Dafidin womu ge u wom kowobun wirugii kua ka mɔrɔku. U nɛɛ, 2Gusunɔ, a nɛn weeweenu nɔɔwɔ, kpa a nɛn kanaru nɔ. 3Saa tontonden diya na nun nɔɔgiru sue ka nuku sankiranu. A ka man guuru yɔɔwo te na ǹ kpɛ̃ n ka tii yɔ. 4Domi a sãawa nɛn kuku yeru. Ma a maa sãa nɛn gbãraru nɛn yibɛrɛban wuswaaɔ. 5Na kĩ na n wãa wunɛn kuu bekurugirɔ sere ka baadommaɔ, na n kukua wunɛn kaserun kɔkɔrɔ. 6Domi a ra man kue ye na kĩ, kpa a man tubi wɛ̃ ye a ra be ba wunɛn yĩsiru nasie wɛ̃. 7Gusunɔ, a bɛsɛn sina bokon wãaru dakaa daasio. A de win wãaru tu dɛnya. 8Kpa a de u n bandu dii sere ka baadommaɔ wunɛn wuswaaɔ. A de wunɛn bɔrɔkiniru ka wunɛn tɔn geera n wãa wi sɔɔ. 9Saa yera kon nun tɔma sere ka baadommaɔ, kpa na n nɛn nɔɔ mwɛɛru yibiamɔ tɔ̃ɔ baatere.

will be added

X\