Womusu 6

1Womu ge Dafidi u wom kowobun wirugii kua ka mɔrɔku. Ge wee. 2Yinni Gusunɔ, a ka man mɔru sãa, adama na nun kanamɔ, a ku man gerusi, a ku man sɛɛyasia. 3A nɛn wɔnwɔndu waawo, a man bɛkio, domi nɛn wasi kun dam mɔ. Wee na gɔɔ dɔɔ. 4Nɛn bwɛ̃ra kun kpĩ. Yinni, sere saa yerà kaa man deri mɛ. Saa yerà kaa man somiru na. 5A wurama a man faaba ko. A man wɔro wunɛn durom sɔ̃. 6Domi wi u gu u ǹ maa wunɛn bwisikunu mɔ̀. Wi ba sika u ǹ maa kpɛ̃ u nun sã. 7Yinni Gusunɔ, weeweenu dera na ǹ dam mɔ. Wɔ̃kuru baatere nɛn nɔni yĩresu ra n kokumɔwa. Wɔ̃kuru baatere nɛn kpin yera ra n waarewa. 8Nɛn nɔni mɔsa swĩin sɔ̃. Yibɛrɛbara ba man yeni kpuro koosia. 9Bɛɛ be i kɔ̃sa mɔ̀ kpuro, i doonɔ nɛn min di, domi na faaba kana. Yinni Gusunɔ u nɛn wuri nua. 10U nɛn weeweenu nua. U nɛn kanaru mwa. 11Yinni Gusunɔ u koo nɛn yibɛrɛba kamia, kpa bu sekuru wa. U koo bu gira, kpa bu biruku yira wura ka sekuru.

will be added

X\