Womusu 59

1Womu ge Dafidi u wom kowobun wirugii kua. U gu kuawa sanam mɛ Sɔɔlu u gɔra bu da bu wi, Dafidin diru tarusi bu nùn go. Ge wee. 2Nɛn Yinni, a man wɔro nɛn yibɛrɛban nɔman di. A man kɔ̃suo ben sɔ̃. 3A man wɔro tɔn kɔ̃sobun nɔman di, kpa a man yakia be ba tɔmbun yɛm yarimɔn nɔman di. 4Domi be wee ba man kasu bu go. Daa bɔɔbɔyagiba ba nɔɔ tia mɔ̀ bu ka man go. Na ǹ kɔ̃sa kue, na ǹ maa durum kue, Yinni Gusunɔ. 5Ka mɛ, ba sɔɔru mɔ̀ bu ka man wɔri. Yinni, a seewo, a man mɛɛrio, a na a man somi. 6Gusunɔ Isireliban Yinni, wunɛ wi a wɔllu ka tem mɔ, a seewo a tɔn kɔ̃so be sɛɛyasia be, be ba ǹ nun nasie. A ku ben goon wɔnwɔndu ko. 7Yoka baayere ba ra nɛwa ba n wori nge bɔ̃nu kpa ba n ka wuu sikerenɛ. 8Kɔ̃sa yarimɔ saa ben nɔsun di, ma n sãa nge ba takobi wuuwa. Domi ba mɔ̀, wara koo nɔ ye ba gerumɔ. 9Adama wunɛ, Yinni Gusunɔ, a bu yɛ̃ɛmɔ. A bwesenu kpuro atafiiru sãa. 10Baa bà n dam mɔ amɔ, wuna na naanɛ sãa. Domi wuna nɛn kuku yee bakaru. 11Yinni kĩrugii, a na a man swaa gbiiya. Wee a dera na nɛn yibɛrɛba mɛɛra ka nuku dobu. 12A ku bu go kpa nɛn tɔmbu bu ku raa ye duari. Adama a de bu sirena, kpa bu wɔruku wunɛn dam sɔ̃. Domi wunɛ, Yinni Gusunɔ, wuna a sãa bɛsɛn tɛrɛru. 13Ben gere kpuro ya durum yibawa. A de ben tii suabu bu bu sura. Domi ba ra n weesu ka gari kɔ̃si gerumɔwa. 14Yinni, a bu kam koosio ka mɔru, kpa ba kun maa wãa. Kpa bu gia ma wuna a bandu dii Yakɔbun bibu sɔɔ ka handunia kpuro sɔɔ. 15Yoka baayere, yibɛrɛ be, ba ra nɛwa ba n wori nge bɔ̃nu kpa ba n ka wuu sikerenɛ, 16ba n kasu ye ba koo di. Kpa ba n wãa mi, wɔ̃ku giriru, domi ba ku ra debu. 17Adama nɛ, na kon womu ko wunɛn dam sɔ̃. Buru buru yellu, na kon nun tɔma wunɛn kĩrun sɔ̃, domi a sãawa nɛn kuku yee damgiru, kpa n kuke wunɛn mi nà n nuki sankire. 18Yinni Gusunɔ, wuna a sãa nɛn dam ka maa nɛn kuku yee damgiru. Wuna kon tɔma, domi a sãawa tɔn geo.

will be added

X\