1 Womu ge Dafidi u wom kowobun wirugii kua. Ge wee. 2 Bɛɛ Wɔrukoon tɔmbu, i ko kpĩ i baawure siri dee dee i n ka sere nɔɔ maari? 3 Aawo, i kɔ̃sa mɔ̀wa gɔ̃ruɔ. Ma i bɔbunu ayeru kɛ̃mɔ. 4 Daa kɔ̃sagii u ra sɔ̃ɔsirewa saa win mɛron nukurun di. Wee kowo u ra kɔ̃ɔrewa saa win birun di. 5 Ben nɔɔ ga ra n dɛ̃ɛ yibawa nge waa, kpa ba n ben swasu kɔrua nge surɔkɔru 6 te ta kun kĩ tu dobo dobogibun gari nɔ, baa mam wi u dobo dobo yɛ̃ru bon gari. 7 Yinni Gusunɔ, a bu nɔɔ kɔsukuo. Be, be ba sãa nge gbee sinan kpɛmminu mi, a ben baa saburosu yakirio. 8 A de bu yarina nge nim mɛ mu kokumɔ, kpa a bu twee bu ko kpanɔbu. 9 Bu gbio bu yanda nge sokoro, kpa a ku de bu sɔ̃ɔ wa nge bii wìn suru kun yiba ba ka mara. 10 Kaa bu gurawa fuuku ka woo guna sere bu ka nɛɛ, weke te ba swɛ̃n koru ta dɔ̃ɔ wa ta swĩa, baa dãa yà n gbere. 11 Adama gemgii u ko n nuku dobu mɔwa ù n wa ba nùn mɔru bara. U koo win naasu kpakia tɔn kɔ̃sobun yɛm sɔɔ, 12 kpa tɔmbu bu nɛɛ, gemgiiwa u koo are wa. Domi Gusunɔwa u handunian tɔmbu kpuro sirimɔ.
