Womusu 56

1Womu ge Dafidi u wom kowobun wirugii kua. Ba gu kuawa ka dɔkɔ te ta sãare nge kparukogiru ge ga sumɔ dãa bakaru garun wɔllɔ. Dafidi u womu ge kuawa sanam mɛ Filisitiba ba nùn mwa ba nɛni Gatiɔ. Ge wee. 2Gusunɔ, a nɛn wɔnwɔndu waawo, domi tɔn dabira ta man buku buku mɔ̀. Ta ka man tabu mɔ̀, ma ta man nɔni sɔ̃ɔmɔ tɔ̃ɔ baatere. 3Nɛn yibɛrɛ be, ba dabi, ba man buku buku mɔ̀wa saa kpuro, be, be ba ka man tabu mɔ̀ mi, ba man wɔri ba taare. 4Bɛrum mù n man mwa. Wuna na ra n naanɛ sãa. 5Yinni, na nun siara gari yi a geruan sɔ̃. Na ǹ gãanu ganun bɛrum mɔ, domi na nun naanɛ sãa. Mba tɔnu u koo kpĩ u man kua. 6Tɔ̃ɔ baatere ba ra man gari kɔsiwa, kpa ba n man gãa kɔ̃sunu bwisikusimɔ. 7Ba nɔɔ tia kua, ba man sakiriammɛ. Ba nɛn yira kasu bu ka man hunde wuna. 8Domi ba tamaa kɔ̃sa ya koo bu yara. Yinni, a bu suro ka mɔru. 9A nɛn yira kpuro swĩi mi na kpikiru da. A nɛn nɔni yĩresu gãrio wunɛn bwãaru sɔɔ. A sin geeru yorua wunɛn tireru sɔɔ. 10Gusunɔ, nà n nun nɔɔgiru sue, nɛn yibɛrɛba ba koo biru wura. Domi na yɛ̃ kam kam ma a sãawa nɛgii. 11Yinni Gusunɔ, na nun siara gari yi a geruan sɔ̃. Mɛya kon maa nun tɔma wunɛn gari yin sɔ̃. 12Na ǹ gãanu ganun bɛrum mɔ, domi na nun naanɛ sãa Yinni. Ǹ n mɛn na, mba tɔnu u koo kpĩ u man kua. 13Gusunɔ, kon nɛn nɔɔ mwɛɛru yibia te na nun kua. Kon yãkunu ko n ka nun siara. 14Domi a man yara saa gɔɔn di. Mɛya a ǹ derimɔ nɛn naasu su sokura. Kpa n kpĩ n sĩ wunɛn wuswaaɔ tɔmbun suunu sɔɔ.

will be added

X\