Womusu 55

1Womu ge Dafidi u wom kowobun wirugii kua ka mɔrɔku. Ge wee. 2Yinni Gusunɔ, a swaa tem kpĩiyɔ a nɛn kanaru nɔ. A ku man biru kisi nà n nun kanamɔ. 3A nɛn laakari koowo kpa a man wisi. Wee na sirenɛ ka nuku sankiraru, 4na burisinɛ yibɛrɛban garin sɔ̃ ka tɔn kɔ̃sobun dam dɔrebun sɔ̃. Tɔmba man kɔ̃sa kuammɛ, ba man taarɛ wɛ̃ ka mɔru baka. 5Na nuki sankire too nɛn gɔ̃ruɔ. Ma gɔɔn bɛrum man nɛnua. 6Na nanda sere na diirimɔ. 7Na nɛɛ, nà n daa kasa mɔ nge kparuko, kon yɔ̃wa n da n sina na n wɛ̃re. 8Kon duka yakura n da mi n toma, kpa na n wãa gbaburɔ. 9Kon duka yakura fuuku n kuku yeru kasu, kpa guru woo damguu gu ku raa man so. 10Yinni, a nɛn yibɛrɛban kpunaa kam koosio, kpa bu ku nɔɔsina. Domi na waamɔ tɔmba wɔbia ka sannɔsu mɔ̀ wuuɔ 11ba ka gen gbãraru sikerenɛ sɔ̃ɔ sɔɔ ka wɔ̃kuru. Mɛya kɔ̃sa ba mɔ̀ wuu ge sɔɔ. 12Nuku kɔ̃surugibu ka gbɛnɔbu ka keetagiba ba yiba wuu ge sɔɔ. 13Ǹ n yibɛrɛn na u na u man wɔnwa, na ǹ gam gerumɔ. Goo ù n man tusa, kon kuke win sɔ̃. 14Adama wuna a kua mɛ, wunɛ wi a sãa nɛn beruse ka nɛn bɔrɔ, wunɛ wi na ra nɛn asiri sɔ̃. 15Nɛ ka wunɛ, kĩi bakara ta sun maninɛ, ma sa dɔɔ sannu Yinni Gusunɔn sãa yerɔ. 16A de gɔɔ u tɔn kɔ̃sobu sɛ̃re subaru sɔɔ, kpa bu da gɔribun wãa yerɔ wasiru. Domi nuku kɔ̃sura yiba ben swaa sɔɔ. 17Adama Yinni Gusunɔ, wuna na faaba kanamɔ. Kaa maa man faaba ko. 18Tɔ̃ɔ giriru kpuro, na ra n weeweenu mɔ̀wa. Mɛya a maa nɛn nɔɔ nɔɔmɔ. 19A ǹ kaa de yibɛrɛba bu man nɔma turi baa mɛ ba dabi. Kaa man bɔri yɛndu wɛ̃. 20Yinni Gusunɔ, wunɛ wi a sɔ̃ wunɛn sina gɔnaɔ sere ka baadommaɔ, wuna kaa nɛgii nɔ, kpa a bu sekuru doke. Domi n ǹ koorɔ bu gɔ̃ru gɔsia yèn sɔ̃ ba ǹ nun nasie. 21Ba wi u ka bu wãa bɔri yɛndu sɔɔ sannɔ wɔri. Ba arukawani ye u ka bu bɔkua kusia. 22Gari doriya yi ra n wãa tɔn kɔ̃so win nɔɔwɔ. Adama tabun gariya yi ra n wãa win nukurɔ. Mɛya maa win gari yi ra n kokumɔwa nge gum yarum. Adama yi ra n sãawa nge takobiba. 23A wunɛn wãaru kpuro Yinni Gusunɔ nɔmu sɔndio, kpa u nun nɔɔri. Domi u ǹ derimɔ gemgii u wɔruma. 24Yinni Gusunɔ, wuna kaa de tɔn kɔ̃sobu bu da gɔribun wãa yerɔ. Kpa tɔn gowobu ka be ba bwisi kɔ̃si mɔ bu gbi sɛkum. Adama nɛ, wuna na naanɛ sãa, Yinni Gusunɔ.

will be added

X\