1 Dafidin womu ge u wom kowobun wirugii kua ka gaasiraru. Ge wee. 2 Wee nge mɛ gari bakasu su sãa. Su ra nɛɛ, Gusunɔ sari. Su sankire. Su kom kɔ̃sum mɔ̀. Sin gagu sari ge ga gea mɔ̀. 3 Yinni Gusunɔ u tɔmbu mɛɛrima saa wɔllun di, u ka wa goo ù n wãa u bwisi mɔ, u ka wa goo ù n wãa u nùn sãamɔ. 4 Adama u wa be kpurowa ba kɔ̃ɔre. Be kpurowa ba sankire. Be kpurowa ba kɔ̃sa mɔ̀. Baa ben turo kun gea mɔ̀. 5 Ye u wa mɛ, yera u tii bikia u nɛɛ, kɔ̃san kowo be, ba ǹ yɛ̃ru mɔ? Wee ba nɛn tɔmbu gbɛnimɔ. Ben goo kun man sãamɔ. 6 Yen sɔ̃, ba koo nanda bu diiri sanam mɛ gãa bɛrumginu sari. Be ba ka nun tabu mɔ̀, Gusunɔ u koo ben kukunu yarinasia. Ba koo sekuru wa yèn sɔ̃ u bu yina. 7 Yinni Gusunɔ, na nun kanamɔ a de faaba kowo goo u yari Siɔnin di u Isireliba, Yakɔbun bweseru yara dɛsirun di, kpa ba n wãa bɔri yɛndu sɔɔ. À n kua mɛ, anna a nuku dobu wa bi ba koo ko mi.
