Womusu 51

1- 2Ye Dafidi u ka Bati Seba kpuna u kpa, Gusunɔn sɔmɔ Natani u da win mi. Yen biruwa Dafidi u wom kowobun wirugii womu geni kua. Ge wee. 3Gusunɔ, a man durom kuo wunɛn kĩi geerun sɔ̃. A nɛn toraru wunɔ wunɛn wɔnwɔndun sɔ̃. 4A man woburuo sãa sãa kpa a nɛn kom kɔ̃sum wɔka. A nɛn durum wunɔ kpa n sãra. 5Domi na nɛn toraru wura, nɛn durum ya maa man bitani mɔ̀ baadomma. 6Wunɛ turowa na torari, na maa kua ye ya ǹ nun dore. Yen sɔ̃, a gem mɔ ye a ka man taarɛ wɛ̃. Wunɛn siribu bu dɛnde. 7N wee, kom kɔ̃sum sɔɔra ba man mara. Nɛn mɛro wi u maa nɛn gura sua, win tii u sãawa durumgii. 8Adama gema a bikiamɔ gɔ̃ruɔ. Ǹ n mɛn na, a de wunɛn bwisi yi n man wãasi. 9A man dɛɛrasiabun wororu koosio kpa n dɛɛra. A man woburuo kpa n burura n wɛ̃su kera. 10A man nuku dobu wɛ̃ɛyɔ kpa na n dɛsinu karamɔ. Baa mɛ a nɛn gɔma dwiiyasia, kon kpam yɛ̃ɛri. 11A ku nɛn durum mɛɛri, a nɛn kom kɔ̃sum kpuro wɔko. 12Gusunɔ, a man gɔ̃ru wɛ̃ɛyɔ ge ga dɛɛre, kpa a man hunde kpaa wɛ̃ ye ya koo yɔ̃ra sim sim. 13A ku man gira wunɛn bɔkun di, a ku maa man wunɛn Hunde Dɛɛro mwaari. 14A kpam man wunɛn faaban nuku dobu wɛ̃ɛyɔ, kpa kĩi geeru tu nɛn hunde dam kɛ̃. 15Sanam mɛya kon durumgibu wunɛn swaa sɔ̃ɔsi, be, be ba nun torari, kpa bu wurama wunɛn mi. 16Gusunɔ, wunɛ wi a man faaba kua, a ku maa man goon yɛm bikia. Ko na n wunɛn gem mɛ a man wɛ̃ takaru mɔ̀. 17Yinni Gusunɔ, a nɛn nɔɔ wukio kpa gu nun siara bu nɔ yam kpuro. 18À n daa yãku dɔ̃ɔ mwaararugiru kĩ, na n daa nun tu kue. Adama a ǹ yãkunu kĩ. 19Yãku te ta nun wɛ̃re, teya gɔ̃ru ge ga tii kawa. Gusunɔ, a ǹ tɔmbu yinamɔ be ba tuuba kua ka tii kawabu. 20A de a ka Siɔni nɔnu geu mɛɛri kpa a ye gea kua, kpa a Yerusalɛmun gbãraru seeya. 21Sanam mɛya kaa yãkunu mwa ni a bikia. Niya yãku dɔ̃ɔ mwaararuginu. Kpa bu naa kinɛnu go wunɛn yãku yerɔ.

will be added

X\