Womusu 50

1Asafun womu. Ge wee. Yinni Gusunɔ u gari mɔ̀, u handuniagibu soku be ba wãa sɔ̃ɔ yari yerɔ n ka da sɔ̃ɔ duu yerɔ. 2Gusunɔ u kurama saa Siɔni wuu burɔ gen min di ka yam bururam. 3Bɛsɛn Yinni u wee wi, wi u ku ra mari. Win wuswaaɔ dɔ̃ɔ boko sɔ̃rua, ma guru woo bɔkɔ ga ka nùn sikerenɛ. 4U nɔɔgiru sue wɔllɔ ka temɔ u ka win tɔmbu siri. 5U mɔ̀, i man nɛn tɔmbu mɛnnama be ba man naanɛ sãa, be, be ba ka man arukawani bɔkua ma ba ye sire ka yãkuru. 6Wɔllu kpuro ta koo win gem gari kpara. Domi wiya u sãa siri kowo. 7Yinni Gusunɔ u nɛɛ, i swaa dakio bɛɛ nɛn tɔmbu Isireliba. Na kon bɛɛ sɔ̃ ma nɛna na sãa bɛɛn Yinni. 8N ǹ bɛɛn yãkunun sɔ̃ na bɛɛ gerusimɔ. Domi na ra bɛɛn yãku dɔ̃ɔ mwaararuginu mwɛ baadomma. 9Na ǹ maa naa kinɛnu mwaamɔ bɛɛn yɛnuɔ, ǹ kun mɛ boo kinɛnu bɛɛn boo gɔ̃sɔ. 10Domi nɛna na gbeeku yɛɛ kpuro mɔ ka yi yi wãa guunɔ dabi dabinu. 11Na gunɔ si su wãa guunɔ kpuro yɛ̃ ka maa yɛɛ yi yi wãa yakasɔ. Yi maa sãawa nɛgii. 12Ǹ n gɔ̃ɔrun na ta man mɔ̀, n ǹ wunɛ kon sɔ̃. Domi nɛna na handunia mɔ ka ye ya wãa ye sɔɔ kpuro. 13I tamaa kon naa kinɛnun yaa temwa? I tamaa boo kinɛnun yɛma kon nɔ? 14Ye n buram bo, yera i nɛ Gusunɔ bɛɛn Yinni siara. Kpa i bɛɛn nɔɔ mwɛɛnu yibia ni i man kua. 15A man sokuo sanam mɛ a nuki sankire. Saa ye sɔɔ, kon nun wurari, kpa a man bɛɛrɛ wɛ̃. 16Adama Gusunɔ u kɔ̃san kowo sɔ̃ɔmɔ u mɔ̀, mban sɔ̃na a nɛn woodaba siamɔ ma a nɛn arukawanin gari gerumɔ, 17wunɛ wi a ku ra sɔ̃ɔsiru kã, ma a nɛn gere atafiiru sãa. 18À n gbɛnɔ wa, a ra ka nùn nɔɔ tia ko, a ra n wãa ka sakara kowobu. 19Wunɛn nɔɔ ga ra n kɔ̃sa yibawa, wunɛn yara ya weesu sekumɔ. 20Mi a sina kpuro, wunɛn winsimwa a ra n wĩimɔ, kpa a n wunɛn mɛro bisin kɔ̃sa gerumɔ. 21Yeniba kpurowa a kua, ma na maari. Domi a tamaa na sãawa nge wunɛ. Adama kon nun taarɛ wɛ̃ kpa n kpuro terasia wunɛn wuswaaɔ. 22I laakari koowo, kpa i swaa daki i nɔ bɛɛ be i nɛ Gusunɔ duari. Ma n kun mɛ, kon bɛɛ sɛ̃re n yaaku. Goo kun maa kpɛ̃ u bɛɛ wɔra. 23Wìn yãkuru ta sãa siarabu, yɛ̃rowa u man bɛɛrɛ wɛ̃ɛmɔ. Wi u maa win tii nɛni dee dee yɛ̃rowa u koo nɛn faaba wa.

will be added

X\