Womusu 5

1Dafidin womu ge u wom kowobun wirugii kua ka gaasiraru. Ge wee. 2Yinni Gusunɔ, a man swaa dakio. Gusunɔ, a nɛn weeweenu nɔɔwɔ. 3Yinni Gusunɔ, a nɛn wuri swaa dakio. Yinni, nɛn sina boko, wuna na kanamɔ. 4Yinni Gusunɔ, a ra nɛn kanaru nɔ bururu. Yinni Gusunɔ, a ra nɛn nɔɔ nɔ sɔ̃ɔ ù n yara. Wee na wunɛn wisibu mara. 5Yinni Gusunɔ, a ku ra kɔ̃sa kã. Kɔ̃san kowobu ba ǹ wãa yeru wasi wunɛn mi. 6Tii suobu ba ǹ kpɛ̃ bu yɔ̃ra wunɛn mi. A kɔ̃san kowobu tusa. 7A tɔn gowobu tusa. A taki diobu tusa. A ra wee kowobu kpeerasie. 8Adama nɛ, wunɛn durom bakam sɔ̃na kon kpĩ n da wunɛn sãa yerɔ. Wunɛn durom bakam sɔ̃na kon kpĩ n yiira mi a wãa. Miya kon kpĩ n nun bɛɛrɛ wɛ̃. Miya kon kpĩ n nun sã. 9Yinni Gusunɔ, a sãawa bɔrɔkini. Yinni Gusunɔ, a man swaa sɔ̃ɔsio ye a kĩ n swĩi. Yinni Gusunɔ, a nɛn yibɛrɛba sɔ̃ɔsio ma wuna a man kpare. 10Ben gari kun naanɛ mɔ. Ben yara ya ra n tɔmbu fufu mɔ̀wa. Kɔ̃sa ben bwisikunu nu ra n naa gire. Kam koba ben gere ya ra ka nɛ. 11A bu nɔni sɔ̃ɔwɔ ben taarɛn sɔ̃. A bu sureo ben tiin yina sɔɔ. A bu giro wunɛn wuswaan di, domi ben durum ya kpã. Ba maa nun seesi. 12- 13Be ba sãa wunɛgibu, kaa de bu nuku dobu wa. Kaa de bu katinu kara. Kaa de bu yɛ̃ɛri. Kaa bu kɔ̃su. Kaa bu domaru kua. Kaa bu ganɛ nge tɛrɛru wunɛn kĩrun saabu, domi ba nun kĩ, ma ba nun mɛm nɔɔwammɛ.

will be added

X\