1 Womu ge Koren bibu ba wom kowobun wirugii kua. Ge wee. 2 Bɛɛ bwesenu kpuro, i swaa dakio i nɔ. Bɛɛ handuniagibu, i swaa tem kpĩiyɔ i nɔ. 3 Damgibu ka bwɛ̃ɛbwɛ̃ɛbu, i swaa dakio i nɔ. Sãarobu ka gobigibu, i swaa tem kpĩiyɔ i nɔ. 4 Na kon gari bwisigii gere. Nɛn bwisikunu nu maa asansi mɔ. 5 Na bwisigibun mɔnnu swaa daki, na kon maa bɛɛ nu tubusia ka mɔrɔku. 6 Mban sɔ̃na kon bɛrum ko wahalan saa sɔɔ. Mban sɔ̃na kon bɛrum ko sanam mɛ nɛn yibɛrɛba ba man sikerenɛ nuku kɔ̃surun sɔ̃. 7 Ba ben dukia naanɛ sãa. Ma ba tii sue dukia yen kpãarun sɔ̃. 8 Adama ben goo kun kpɛ̃ u win winsim hunde yakia, kpa u Gusunɔ yen kɔsiaru wɛ̃. 9 Domi hunden yakiabu gãa bakana, bu ǹ nɔru mɔ. Yen sɔ̃na n ǹ koorɔ bu kpĩ bu ye ko, 10 n ǹ maa koorɔ ba n wãa sere ka baadommaɔ. Ba ǹ kpɛ̃ bu gɔɔ yina. 11 Domi sa waamɔ ma bwisigibu ka gari bakasu kpurowa ba gbimɔ. Ma ba ben dukia derimɔ gabu bu gura. 12 Mɛya be ba yĩsiru yara ba ra n bwisika ma ben yɛnusu ko n wãawa sere ka baadommaɔ. Ben wãa yenu kun maa kam mɔ̀. 13 Adama tɔnu wi u bɛɛrɛ mɔ u ku ra tɛ. U sãawa nge yɛɛ yi ba ra sakiri. 14 Nge mɛya ben are sãa, be ka be ba bu swĩi ba ben gari swaa daki. 15 Ba ra bu surewa gɔriɔ nge yãa gɔ̃ɔ ge ba sure wɔru sɔɔ, kpa gɔɔ u bu di. N sosi, tɔn dɛɛroba koo bu taaku, kpa ben bɛɛrɛ yu kpe, kpa gɔribun wãa yeru tu ko ben yɛnu. 16 Adama Gusunɔ u koo nɛn hunde wɔra saa gɔribun wãa yerun di. Domi u koo man kɔ̃su. 17 Yen sɔ̃, a ku nanda tɔnu ù n dukia guramɔ, ma win yɛnun arumani ya sosimɔ. 18 A n yɛ̃ ma u ǹ ka yen gaa dɔɔ gɔriɔ, ba ǹ maa ka nùn yen gaa sikumɔ. 19 U ko n nuku dobu mɔ win wãaru sɔɔ, kpa ba n nùn siaramɔ nuku doo bi u mɔ̀n sɔ̃. 20 Adama yen kɔkɔrɔ, u koo win baababa deemawa gɔriɔ. Be, ba ǹ maa handunian yam bururam wasi. 21 Tɔnu wi ba bɛɛrɛ wɛ̃ɛmɔ, ma u ǹ bwisi mɔ, u sãawa nge yɛɛ yi ba mwɛɛrima bu sakiri.
