Womusu 48

1Womu ge Koren bibu ba kua. Ge wee. 2Yinni Gusunɔ, a kpã, yen sɔ̃na n weenɛ bu nun tɔma baama, wunɛn wuuɔ ka wunɛn guu dɛɛra ten wɔllɔ te ba mɔ̀ Siɔni. 3Ta yɔ̃ buram buram tɔna. Wi u tu mɛɛra kpa u n nuku dobu mɔ̀ ten buram sɔ̃. Guu ten sɔ̃ɔ yɛ̃san nɔm geu gia, sina bokon sina kpaara mi. 4Yinni Gusunɔ, wunɛn sina kpaaru sɔɔ, a ra sun sɔ̃ɔsiwa ma a sãa bɛsɛn kuku yeru ka gem. 5Domi wee, sinambu ba mɛnna, ba nɔɔ tia kua bu ka Siɔni wɔri. 6- 7Adama ye ba nun wa, miya bɛrum bu mwa, ba wurura nge tɔn kurɔ wi marubun wahala ya nɛnua sanam mɛ u yiire. Yera ba nanda ba duki sua. 8Ba fukura ba wɔruka nge goo nimkuu ge sɔ̃ɔ yari yerun woo ga fuka. 9Ye sa nɔɔmɔ ba gerumɔ, sa ye wa Gusunɔ, wɔllu ka tem Yinnin wuuɔ. Sa ye wa Gusunɔ bɛsɛn Yinnin wuuɔ. Wiya u koo de wuu ge, ga n wãa sere ka baadommaɔ. 10Gusunɔ, sa wunɛn durom bwisikunu mɔ̀ wunɛn sãa yee ten mi. 11Nge mɛ a yĩsiru yara, nge mɛya ba koo nun tɔma handunian goonu nnɛ sɔɔ. Domi a ra tɔmbu kpare gem sɔɔ. 12Be ba wãa Siɔnin guurɔ, ba nuku dobu mɔ̀. Yudan tɔmbu ba yɛ̃ɛrimɔ wunɛn siri bi a kuan sɔ̃. 13I sĩiyɔ i ka Siɔni sikerena. I yen kɔ̃su yenu gario. 14I yen gbãra te mɛɛrio, kpa i yen sina kpaanu mɛɛri i ra ka bɛɛn bibu yen faagi kua, 15i nɛɛ, Yinni Gusunɔwa u sãa bɛsɛn Yinni sere ka baadommaɔ. Wiya u koo maa sun kpara sere ka bɛsɛn gɔɔn tɔ̃rɔ.

will be added

X\