Womusu 46

1Womu ge Koren bibu ba wom kowobun wirugii kua. Ba gu kuawa ka gɔ̃ru yãka. Ba nɛɛ, 2Gusunɔwa u sãa bɛsɛn kuku yee naanɛgiru ka bɛsɛn tãsi yeru. Baa nuku sankiranu sɔɔ, u ra n sɔɔru sãawa u ka tɔnu somi. 3Yen sɔ̃na sa ǹ bɛrum mɔ̀ sanam mɛ tem mu yĩirimɔ, ǹ kun mɛ sanam mɛ guunu diirimɔ nim wɔ̃kun sɔɔwɔ. 4Sa ǹ nande sanam mɛ nim wɔ̃kun nim kurenu nu wɔki nu yaka mɔ̀ sanam mɛ nu guunu yĩirimɔ. 5Daaru gara wãa tèn nim mu ka nuku dobu naamɔ Wɔrukoon wãa yerɔ, dii dɛɛra ten mi, mi wi, Gusunɔ u wãa. 6Gusunɔ u wãa te sɔɔ, yen sɔ̃na ta ǹ wɔrumɛ. Gusunɔ u ra tu gabewa saa buru buru yellun di. 7Bwesenu nu burisinɛ, ma bannu wɔrukumɔ. Gusunɔ u gbãra, ma tem mu yanda. 8Gusunɔ wɔllu ka tem Yinni u ka sun wãa. Yakɔbun Yinni, u sãawa bɛsɛn kuku yee naanɛgiru. 9I na i wa ye Yinni Gusunɔ u kua. U sɔm maamaakiginu kua handunia sɔɔ. 10U tabu kpeesia yen goonu nnɛ ye sɔɔ. U tɛnnu ka yaasi bɔɔka, ma u tabu kɛkɛ yi dumi gawe dɔ̃ɔ mɛni. 11U nɛɛ, i yɔ̃ro, kpa i gia ma wiya Gusunɔ. U bandu dii bwesenu kpuro sɔɔ, ka tem kpuro sɔɔ. 12Gusunɔ wɔllu ka tem Yinni u ka sun wãa. Wi, Yakɔbun Yinni u sãawa bɛsɛn kuku yee naanɛgiru.

will be added

X\