Womusu 45

1Kĩrun womu ge Koren bibu ba wom kowobun wirugii kua. Ge wee. 2Nɛn gɔ̃ru ga bwisiku duronu yiba sere nu yarimɔ. Na womu geni mɔ̀ sunɔn sɔ̃. Nɛn yara ya sãa nge yoro geon yorutia. 3Wuna a buram bo tɔn bibun suunu sɔɔ. Wunɛn gari yi durom yiba. Yen sɔ̃na a Gusunɔn domaru mɔ sere ka baadommaɔ. 4Tabu kowo damgii, a wunɛn takobi bɛkio, wuna a yiiko ka bɛɛrɛ baka mɔ. 5Ka wunɛn sinandun dam, a wunɛn tabu kɛkɛ yɔɔwo a da a nasara sua, kpa a gem sanna ka daa duudwia ka gean kobu, kpa a sɔm maamaakiginu ko ka wunɛn nɔm geun dam. 6Wunɛn sɛ̃ɛnu nu nɔɔ do, nu koo wunɛn yibɛrɛba sɔku, kpa tɔmbu bu wɔruku wunɛn wuswaaɔ. 7Gusunɔ, ba wunɛn bandu swĩi sere ka baadommaɔ. Gema a ka wunɛn bandu nɛni. 8A gea kĩ, ma a kɔ̃sa tusa. Yen sɔ̃na Gusunɔ wi u sãa wunɛn Yinni, u nun gɔsa. U maa nun nuku dobu wɛ̃ ye u ka nun aye bɛɛrɛgiru wɛ̃ te ta wunɛn kpaasibugiru kpãaru kere. 9Wunɛn yãnu nu turare numɔ ye ba ra soku miru ka aloɛsi ka kasi. Ba mɔrɔkunu soomɔ a ka nuku dobu wa wunɛn sina gbaburɔ te ba suunu donnu mani mani. 10Sina bii wɔndiaba ba sãa wunɛn kurɔ kpaa sãkobu. Kurɔ kpao u yɔ̃ wunɛn nɔm geuɔ u wura sebua ye ya na Ofirin di. 11A swaa dakio, bii kurɔbu a nɛn gari nɔ, kpa a yi bwisiku. A wunɛn tɔmbu duario ka wunɛn baan yɛnugibu. 12Wunɛn buram mu ka sina boko naawa gem gem. A nùn bɛɛrɛ wɛ̃ɛyɔ yèn sɔ̃ u sãa wunɛn yinni. 13Tirin tɔmbu be ba bwesenu kpuro arumani kere, ba koo ka nun dukia bwese bweseka naawa bu ka wunɛn kĩi geeru kasu. 14Sina bii wɔndia kurɔ kpao wi, u wãa sina kpaarɔ, u yãnu sebua ni ba buraru koosi ka wuraba. 15Ba ka nùn da sunɔn mi ka win yãa bura nɔnigii ni, ma win kurɔ kpaa sãkoba nùn swĩi. 16Ba bu duusia sina kpaarɔ ka nuku dobu ka yɛ̃ɛribu. 17Sina boko, wunɛn biba koo wunɛn baababan tubi di, kpa bu bandu di tem kpuro sɔɔ. 18Nɛn womu geni, ga koo de bu wunɛn yĩsiru yaaya tɔ̃ru baatere, kpa bwesenu kpuro nu nun siara sere ka baadommaɔ.

will be added

X\