Womusu 44

1Womu ge Koren bibu ba wom kowobun wirugii kua. Ge wee. 2Gusunɔ, sa nua ka bɛsɛn tiin swaa wunɛn sɔma ye a kua bɛsɛn baababan waati. Bera ba sun ye sɔ̃ɔwa. 3Ka wunɛn tiin nɔma a bwese tukunu gira. A bwese ni so nu yarina, ma a bɛsɛn baababa swĩi nin wãa yenɔ. 4Bɛsɛn baaba be, ba bwese nin tem mwa. N ǹ mɔ yèn sɔ̃ ba takobi mɔ, n ǹ maa mɔ yèn sɔ̃ ba dam mɔ, adama yèn sɔ̃ a bu kĩwa ma a wãa ka be, ma a bu yara ka wunɛn nɔmu. 5Gusunɔ, wuna a sãa nɛn sina boko. A wunɛn tɔmbu nasara wɛ̃ɛyɔ. 6Ka wunɛn dama sa ko bɛsɛn yibɛrɛba suriri. Ka wunɛn yĩsira sa ko bu suni. 7Domi na yɛ̃ ma n ǹ nɛn tɛndu, ǹ kun mɛ nɛn takobi ya koo man faaba ko. 8Wuna kaa sun wɔra bɛsɛn yibɛrɛban nɔman di. Kpa a be ba sun tusa burisina. 9Sa ko n woo kanamɔ tɔ̃ru baatere wunɛn sɔ̃, sa n nun siaramɔ sere ka baadommaɔ. 10Ka mɛ, wee a sun yina, a sun sekuru doke, a ku ra n maa ka bɛsɛn tabu kowobu wãa bà n tabu yariɔ. 11A dera sa biruku yira wurɔ bɛsɛn yibɛrɛban wuswaaɔ, be, be ba sun tusa ba bɛsɛn yãnu guramɔ. 12A sun bɛri ben nɔmaɔ nge mɛ ba ra arari yãaru nɔmu bɛrie. Ma a dera sa yarina, sa yabi bwese tukunu sɔɔ. 13A bɛsɛ, wunɛn tɔmbu dɔramɔ gobi sari, a ǹ maa sun garisi gãa geenu. 14Wee a sun sekuru doke bɛsɛn berusebun wuswaaɔ, 15be, be ba sun sikerenɛ, ba sun yɛ̃ɛmɔ, ba sun yaakoru mɔ̀. A dera bwese tukunu nu sun womu dokemɔ, ma nu sun wii gimanu koosimɔ ka yaakoru. 16Wee sere ka tɛ̃, seku te, ta ra n man mɔ̀wa, kpa na n nɛn wuswaa wukiri 17yèn sɔ̃ nɛn yibɛrɛ u man wɔri, u wɔmmɔ u man nɔɔ kuurimɔ. 18Yeniba kpurowa ya ra sun deemɛ. Ka mɛ, sa ǹ nun duari, sa ǹ maa wunɛn arukawani kusie. 19Bɛsɛn gɔ̃ru ga ǹ sĩire wunɛn min di, sa ǹ maa gɛre wunɛn swaan di. 20Adama ka mɛ, a sun kɔsuka gbaburɔ dɛmakunun wãa yerɔ. Ma a sun yam wɔ̃kuru wukiri. 21Gusunɔ, sà n daa wunɛn yĩsiru duari, ma sa da sa bũnu ganu sãamɔ, 22a ǹ kaa tubu, wunɛ wi a tɔnun gɔ̃run gari yɛ̃? 23Adama wunɛn sɔ̃na ba sun goomɔ bururu ka yoka, ba sun mɛɛra nge yãa ni ba ka dɔɔ bu go. 24A dom yando Yinni! Mban sɔ̃na a do. A dom yando. A ku sun yina sere ka baadommaɔ. 25Mban sɔ̃na a wunɛn wuswaa berumɔ. Mban sɔ̃na a ǹ bɛsɛn wɔnwɔndu mɔ̀. A ǹ wa nge mɛ ba sun taare? 26Domi sa nuki sankire. Sa kpĩ tua sɔɔ. 27A seewo a sun somi. A sun wɔro wunɛn durom bakam sɔ̃.

will be added

X\