1 Koren bibun womu ge ba wom kowobun wirugii kua. Ge wee. 2 Nge mɛ nim nɔru ga ra de nɛmu ga n daarun nim kasu, nge mɛya nɛn gɔ̃ru ga nun kasu Yinni Gusunɔ. 3 Nɛn gɔ̃ru ga wunɛn bɛkɛ barɔ, Yinni Gusunɔ, wunɛ wi a wãa. Saa yerà na kon tii sɔ̃ɔsi wunɛn wuswaaɔ Yinni. 4 Nɛn nɔni yĩresu su kua nɛn nim nɔruram wɔ̃kuru ka sɔ̃ɔ sɔɔ, sanam mɛ ba man bikiamɔ ba mɔ̀, mana Gusunɔ nɛn Yinni u wãa. 5 Nɛn tororu ta ra karewa nà n yaaya sanam mɛ tɔn dabiru ta ra n man sikerenɛ, na n tu gbiiye su ka da Gusunɔn sãa yerɔ, sa n nuku dobu mɔ̀, sa n Gusunɔ siaramɔ sannu. 6 Mban sɔ̃na ko na n nuki sankire, kpa na n weeweenu mɔ̀. Na ko n nɛn yĩiyɔbu doke Gusunɔ nɛn Yinnin mi, kpa n maa nùn siara. Domi u sãawa nɛn Yinni ka nɛn Faaba kowo. 7 Nɛn Yinni, na nuki sankire. Yen sɔ̃na na nun yaayamɔ saa Yuudɛnin daarun di, ka guu te ba mɔ̀ Hɛɛmɔɔn di ka guu te ba mɔ̀ Miseaan di. 8 Wuna a ra de daarun nim mu kukiri, kpa nim kureru tu se tu garu sua, kpa ni kpuro nu man wukiri. 9 A man wunɛn kĩru sɔ̃ɔsio sɔ̃ɔ sɔɔ, wɔ̃kuru kpa na n womusu mɔ̀, na n nun tɔmamɔ, na n nun kanamɔ wunɛ wi a man wãaru wɛ̃. 10 Gusunɔ, nɛn Yinni, a sãawa nɛn kpee saara. Mban sɔ̃na a man duari. Mban sɔ̃na kaa de nɛn yibɛrɛba ba n man dam dɔremɔ kpa na n nuki sankire. 11 Nɛn kukunu bɛsikiramɔ sanam mɛ ba man nɔni sɔ̃ɔmɔ, ba man wɔmmɔ, ba gerumɔ ba mɔ̀, mana Gusunɔ nɛn Yinni wi. 12 Mban sɔ̃na na kon nuki sankire. Mban sɔ̃na ko na n weeweenu mɔ̀ nɛn gɔ̃ruɔ. Nɛ, kon nɛn naanɛ dokewa wunɛ sɔɔ, kpa n nun siara kpam. Domi a sãawa nɛn Yinni ka nɛn Faaba kowo.
