Womusu 40

1Dafidin womu ge u wom kowobun wirugii kua. U nɛɛ, 2na nɛn yĩiyɔbu doke Yinni Gusunɔn mi. Ma u man sĩirema u nɛn nɔɔ swaa daki. 3U man gawa u yara saa kam kobun wɔrun di, mi pɔtɔkɔ wãa. U nɛn naasu sɔndi kpee saara wɔllɔ, kpa n ka yɔ̃ra dim dim. 4Gusunɔ u dera na womu kpɔɔ mɔ̀ ge na ka nùn siaramɔ. Tɔn dabiru ta nua ma ta bɛrum kua, ma ta ten naanɛ doke Yinni Gusunɔ sɔɔ. 5Doo nɔɔrugiiwa wi u Yinni Gusunɔ naanɛ sãa, wi u ku ra gɛre u tii suobu ka wee kowobu swĩi. 6Gusunɔ nɛn Yinni, wunɛn sɔm geenu ka wunɛn himba ye a sun kua ya dabi. Gusunɔ, a kpã, a ǹ saara mɔ. Na kĩ n ye kpuro kpara n tɔmbu nɔɔsia. Adama yen geera kpã sere na ǹ kpɛ̃ n ye saari. 7A ǹ yãkuru kĩ, ǹ kun mɛ kɛ̃ru. A ǹ yãku dɔ̃ɔ mwaararugiru bikie, ǹ kun mɛ torarugiru. Adama a nɛn swasu kɔria. 8Ma na nɛɛ, nɛ wee, nge mɛ ba nɛn gari yorua woodan tireru sɔɔ. 9Gusunɔ nɛn Yinni, na kĩ n wunɛn kĩru ko. Wunɛn wooda ya wãa nɛn gɔ̃ruɔ. 10Tɔn wɔrun suunu sɔɔ, na ra wunɛn faaban labaari gea kpare. Yinni Gusunɔ, a yɛ̃ ma na ku ra nɛn nɔɔ mari. 11Na ǹ wunɛn faaban gari berua nɛn gɔ̃ruɔ. Na wunɛn naanɛ ka wunɛn somiru tɔmbu nɔɔsia. Na tɔn wɔru guna wunɛn tɔn geeru ka wunɛn bɔrɔkiniru sɔ̃ɔsi. 12Yinni Gusunɔ, a ku de n wunɛn wɔnwɔndu bia. A de wunɛn tɔn geeru ka wunɛn bɔrɔkiniru tu man kɔ̃su saa kpuro sɔɔ. 13Domi kɔ̃sa ye ya man sikerenɛ ya ǹ garirɔ. Nɛn kom kɔ̃sum kpuro man girari, mu ǹ waabu wã. Mu nɛn wirun seri dabiru kere. Na mwia kpana. 14Yinni Gusunɔ, a man wɔro, a na fuuku a man faaba ko. 15A de be ba kasu bu man hunde wuna bu seku bakaru wa. A de be ba nuku dobu mɔ nɛn wahalan sɔ̃ bu biru wura kpa bu sekuru di. 16A de be ba man yaakoru mɔ̀ ba n wãa dɛsirun biti sɔɔ. 17Adama a de be ba nun kasu ba n nuku dobu mɔ. Kpa be ba wunɛn faaba wura ba n yɛ̃ɛrimɔ wunɛn sɔ̃. Kpa ba n gerumɔ ma Yinni Gusunɔwa kpãaru bo. 18Adama nɛ sãarowa, na ǹ gãanu mɔ. Ka mɛ, Yinni u man yaaye. Nɛn Yinni, wunɛ wi a ra man somi kpa a man wɔra, a ku tɛ.

will be added

X\