Womusu 39

1Dafidin womu ge u Yedutum, wom kowobun wirugii kua. U nɛɛ, 2na raa nɛɛ, kon nɛn sanu sanusu laakari ko kpa n ku durum ko nɛn gari gerubu sɔɔ. Kon nɛn nɔɔ kpĩ sanam mɛ nuku kɔ̃surugii wãa nɛn bɔkuɔ. 3Na raa maari, na ǹ gãanu gerua, ma na deema n kua kam, domi nɛn nɔni swãaru ta sosiwa. 4Nɛn laakari ya seewa. Ye na bwisikumɔ ya man nɛni nge dɔ̃ɔ, ma na gerua na nɛɛ, 5Yinni Gusunɔ, a man nɛn wãarun saka sɔ̃ɔsio kpa na n yɛ̃ nge mɛ na ǹ dam mɔ. 6N wee a nɛn tɔ̃ru yĩira ka wunɛn nɔman yasum, ma nɛn wãarun sanam kun gãanu tura wunɛn nɔni sɔɔ. Ka geema tɔnu baawure koo doona nge woo tia, 7ǹ kun mɛ nge tiro. Ye u mɔ̀ kpuro kama. U arumani mɛnnamɔ, u ǹ yɛ̃ wara koo ye di. 8Tɛ̃ Yinni, mba na maa mara. Nɛn yĩiyɔbu wãa wunɛ sɔɔ. 9A man yakio nɛn durum kpuron di. A ku de gari bakasu su n man yaakoru mɔ̀. 10Kon mari, na ǹ gari gerumɔ, domi wuna a dera ya koora mɛ. 11A ku maa man wahala ko. Na wasikiramɔ wunɛn nɔm gɛran sɔ̃. 12A ra tɔnu gerusi kpa a nùn sɛɛyasia win toranun sɔ̃. Ye tɔnu u kĩ, yera a ra di nge kɔkɔbu. Geema, tɔnu baawure u koo doonawa nge woo tia. 13Yinni Gusunɔ, a nɛn kanaru nɔɔwɔ, kpa a nɛn sokuru swaa daki. A ku nɛn wuri atafiiru ko, domi na sãawa sɔɔ wunɛn mi nge nɛn sikadoba kpuro. 14A man derio sɛ̃ɛ, kpa n wom wa n sere sariru ko.

will be added

X\