Womusu 38

1Dafidin womu ge u kua Gusunɔ u ka nùn yaaya. 2Yinni Gusunɔ, a ku man sɛɛyasia wunɛn mɔru sɔɔ. A ku man so sanam mɛ a mɔru bɛsire. 3Domi wunɛn sɛ̃ɛnu nu man girari, ma wunɛn nɔmu ga man so ga sura. 4Wunɛn mɔrun saabu, nɛn wasin gam sari mi n bwãa do. Nɛn durum saabu na ǹ maa dam gam mɔ. 5Domi nɛn toranu kpɛ̃a sere nu man gunum kera. Nu sãa nge sɔmu bakanu ni nu man bunum kere. 6Nɛn booboosu kɔ̃sa sere su numia nɛn gari bakarun sɔ̃. 7Na dɛbara, na wasira sere na ǹ maa dam mɔ. Baadomma, na ra n sĩimɔwa ka nuku sankiranu. 8Domi barara nɛn wasi kpuro mwa. Yin gam maa sari mi n bwãa do. 9Na kɔsikirawa muku muku, na ǹ maa dam gam mɔ. Nɛn gɔ̃ru ga burisinɛ sere na weeweenu mɔ̀. 10Yinni, ye na kĩ kpuro, wuna a yɛ̃. Nɛn weeweenu kun maa nun berue. 11Nɛn gɔ̃ru ga ǹ sɔ̃ sɛ̃ɛ, nɛn dam man doonarimɔ. Wee nɛn nɔni kun maa wãaru tere. 12Nɛn kpaasibu ka be ba man yɛ̃ kpuro ba man duki suurimɔ nɛn bararun sɔ̃. Ma be ba maa wãa nɛn turuku, ba tii mɛna nɛnɛm. 13Be ba kasu bu man go, ba man yɛ̃ri bɛriammɛ baadomma. Be ba nɛn kɔ̃sa kasu, ba man kɔ̃sa siemɔ, ba kasu bu man nɔni wɔ̃ke. 14Adama nɛ, na maariwa piti nge soso wi u kun gãanu nɔɔmɔ, u ǹ maa gãanu gerumɔ. 15Mɛya na sãa nge soso. Na ǹ bu gãanu wisa. 16Yinni Gusunɔ, wunɛ sɔɔra nɛn yĩiyɔbu wãa. Gusunɔ nɛn Yinni, a de a man wisi. 17A ku de bu nuku dobu ko nɛn sɔ̃, kpa bu man seesi sanam mɛ na sokuramɔ. 18Wee na wɔrumaa dɔɔ, ma nɛn wahala ya man wãasi. 19Na nɛn toranu tuuba mɔ̀. Tora ni, nu man bɛrum mɔ̀. 20Wee nɛn yibɛrɛba ba bwãa do, ba maa dam mɔ. Be ba man tusa kam sɔɔ, ba dabi. 21Kɔ̃sa ba man kɔsiemɔ, ye na bu gea kua. Ba nɛn kɔ̃sa kasu yèn sɔ̃ na ra n gea mɔ̀. 22Yinni Gusunɔ, a ku man deri. Nɛn Yinni, a ku ka man tonda. 23A na fuuku a man yakia, wuna a sãa nɛn faaba kowo.

will be added

X\