Womusu 37

1Dafidin womu. A ku tii nɔwia ko tɔn kɔ̃sobun sɔ̃. A ku ka kɔ̃san kowobu kinɛnu ko. 2Domi ba ra mundewa nge yaka gbebusu, kpa bu yanda nge yaka bekusu. 3A n Yinni Gusunɔ naanɛ sãa kpa a n gea mɔ̀. Nge mɛya kaa n ka wãa yeru mɔ tem mɛ sɔɔ, kpa a n bɔri yɛndu mɔ. 4A wunɛn nuku dobu kasuo Yinni Gusunɔn mi. U koo maa nun wɛ̃ ye wunɛn gɔ̃ru ga kĩ. 5A Yinni Gusunɔ wunɛn wãaru nɔmu sɔndio, a n nùn naanɛ sãa. Wiya u koo nun kpuro wunana. 6U koo de wunɛn gem mu sɔ̃ɔsira nge sɔ̃ɔ wii wɔllun sɔ̃ɔ. 7Wi u kpĩa u kɔ̃sa kua ye u gɔ̃ru doke, a ku tii nɔwia ko win sɔ̃. A n maari kpa a n Yinni Gusunɔ swaa daki. 8A mɔru derio, a nuku gbisibu yinɔ, a ku tii nɔwia ko. Ye kpurowa ya koo ra nun kɔ̃sa koosia. 9Domi ba koo tɔn kɔ̃sobu kpeerasia, adama be ba Yinni Gusunɔ naanɛ sãa, bera ba ko n tem mɛ mɔ. 10N tie fiiko ye tɔn kɔ̃soba kun ko n maa ka wãa. Baa à n mɛɛra mi ba raa wãa, a ǹ maa bu wasi. 11Adama be ba tii yɛ̃, ba koo tem mɛ tubi di, kpa ba n yɛ̃ɛrimɔ gem gem alafia sɔɔ. 12Tɔn kɔ̃soba gemgibu bwisiku kɔ̃sunu koosimɔ, ma ba bu wiru diirisimɔ. 13Yinni u tɔn kɔ̃so be yɛ̃ɛmɔ, u yɛ̃ ma tɔ̃ra bu sisie. 14Tɔn kɔ̃soba ben takobi womamɔ, ma ba ben tɛnnu bɛrimɔ bu ka sãarobu ka wɔnwɔndobu hunde wuna, kpa bu be ba gea mɔ̀ go. 15Adama ben takobi be, ba koo duwa ben tiin toronɔ, kpa ben tɛnnu nu bɔɔkira. 16Gãa piimii ni gemgii u mɔ, nu tɔn kɔ̃so dabinun dukia kere. 17Domi ba koo tɔn kɔ̃sobun dam kpeerasia, adama Yinni Gusunɔ u yɔ̃ gemgibun biruɔ. 18Yinni Gusunɔ u yɛ̃ ye n koo taarɛ sarirugibu deema ben wãaru sɔɔ. Ben yɛnu ga ǹ bansu mɔ̀. 19Ba ǹ sekuru wasi wahalan saa sɔɔ. Ba ko ba n maa deburu mɔ gɔ̃ɔrun sanam. 20Adama tɔn kɔ̃soba koo kam ko. Yinni Gusunɔn yibɛrɛba ba ka yakasun wɛ̃su weenɛ. Ba koo yarinawa nge dɔ̃ɔ wiisu. 21Tɔn kɔ̃sobu bà n bɔkura, ba ku ra wesie. Adama gemgii u ra kɛ̃ ka nuku tia. 22Be Yinni Gusunɔ u domaru kua, ba ko n tem mɛ mɔ, adama be u bɔ̃rusi, beya ba koo kpeerasia. 23Yinni Gusunɔ u ra tɔn geo kpare win sanum sɔɔ. Yɛ̃ron swaa ra nùn wɛ̃re. 24Ù n sokura u wɔruma, u ra sewa, domi Yinni Gusunɔ u win nɔma nɛni. 25Na raa sãa bii, tɛ̃ na bukura. Na ǹ maa waare Gusunɔ u gemgii deri, ǹ kun mɛ win bibu bu bara ko bu ka di. 26Baadomma u wɛ̃ɛmɔ ka nuku tia. U ǹ be ba bɔkuramɔ yinarimɔ. Win bibu ba ra maa gabu arufaani kue. 27A kɔ̃sa derio kpa a gea ko, kpa wunɛn bibun bweseru ta n tem mɛ mɔ ka baadommaɔ. 28Yinni Gusunɔ u gem kĩ. U ǹ win tɔmbu derimɔ, u ra n bu kɔ̃su. Adama ba koo tɔn kɔ̃sobun bweseru kpeerasia. 29Gemgiba ko n tem mɛ mɔ, kpa ba n wãa mi, ka baadommaɔ. 30Gemgiin nɔɔ, gari bwisigiiya ga ra yare. Win yara, gema ya ra maa gere. 31Gusunɔn wooda ya ra n wãa win gɔ̃ruɔ. Win naasu kun maa sokuramɔ. 32Tɔn kɔ̃so u ra n gemgii sãkiriammɛwa, kpa u n swaa kasu u ka nùn go. 33Adama Yinni Gusunɔ kun derimɔ u nùn nɔma turi. U ǹ maa nùn taarɛ wɛ̃ɛmɔ siribun sanam. 34A n Yinni Gusunɔ yĩiyɔ kpa a n win swaa swĩi. U koo nun wɔlle sua kpa a n ka tem mɛ mɔ. Kaa wa tɔn kɔ̃soba kpeerɔ. 35Na tɔn kɔ̃sobu wa ka ben dam kpuro, ba yɛki nge dãa kɛrigiru te ta kpare. 36Adama ben baa ya doona, wee ba ǹ maa wãa. Na bu kasu, adama ba ǹ waarɔ. 37A taarɛ sarirugii mɛɛrio kpa a n nùn lasabu sãa. Domi wi u ra bɔri yɛndu kãn bwesera kun kpeemɔ. 38Adama mɛm nɔɔ sarirugiba koo kam kowa kpuro, kpa tɔn kɔ̃sobun bweseru tu kpeera. 39Yinni Gusunɔwa u gemgibu faaba mɔ̀. Wiya u ra bu bere nɔni swãarun sanam. 40U bu somimɔ, u bu wɔramɔ tɔn kɔ̃sobun nɔman di, u bu faaba mɔ̀, domi win miya ba ben kuku yeru kasu.

will be added

X\