1 Womu ge Dafidi Gusunɔn sɔm kowo u wom kowobun wirugii kua. U nɛɛ, 2 tɔn kɔ̃so wi u ǹ ka Gusunɔ yɔ̃n gari man sɔkumɔ nɛn gɔ̃ruɔ, domi u ǹ bwisikumɔ ma n weenɛ u Gusunɔ nasia. 3 U win tii sue too. Yen sɔ̃na u ǹ win toraru wuramɔ, kpa u tu tusi. 4 Win gari kpuro, weesa yi sãa. U ku ra wure u gãanu ko ka laakari u sere gea ko. 5 Kɔ̃sa u ra n bwisikumɔ win kpin yerɔ. Yen swaa sɔɔra u ra n maa wãa. U ku ra ye duka suuri. 6 Adama Yinni Gusunɔ, wunɛn durom mu wãawa sere ka wɔllɔ. Wunɛn bɔrɔkiniru ta maa sɔ̃ɔsire sere ka guru winɔ. 7 Mɛya maa wunɛn gem mu kpã nge guu bakanu. Wunɛn siribu bu duku nge nim wɔ̃kun bweru. Yinni Gusunɔ, wuna a ra tɔmbu ka yɛɛ nɔɔri, 8 domi wunɛn kĩru ta kpã. Wunɛn kasenun kɔkɔrɔwa tɔmba kuku yenu kasu. 9 A ra wunɛn durom yibie nge be ba di ba deba. A ra bu nuku dobu wɛ̃ nge be ba nim gem wa ba nɔra. 10 Domi wuna a sãa wãarun nuuru. Wunɛn yam bururam saabuwa sa ka wãarun asansi tubumɔ. 11 A be ba nun yɛ̃ durom kuo. A bèn gɔ̃ru ga dɛɛre bɔrɔkiniru sɔ̃ɔsio. 12 A ku de tii suobu bu man naa turi, kpa tɔn kɔ̃sobu bu de n duka yakura. 13 Wee be ba kɔ̃sa mɔ̀, ba wɔrukumɔ, ma ba kpanɛ bu se.
