Womusu 35

1Dafidin womu. Yinni Gusunɔ, be ba man wɔrim wee, a bu wɔrio. Be ba ka man sannamɔ, a ka bu sannɔ. 2A tɛrɛ piibu ka bakaru suo, kpa a na a man somi. 3A wunɛn yaasa suo a be ba man nɔni sɔ̃ɔmɔ sɔ̃ɔsi, kpa na n yɛ̃ ma wuna a sãa nɛn faaba kowo. 4A de be ba man kasu bu go bu sekuru wa. A de be ba kĩ n kam ko bu biti soora kpa bu biru wura. 5A de ba n sãa nge yaka si woo ga ka doonɔ, kpa Yinni Gusunɔn gɔrado u bu gira. 6A de ben swaa yu wɔria, kpa yam wɔ̃kuru tu ye wukiri. Kpa Yinni Gusunɔn gɔrado u bu naa swĩi. 7Wee na ǹ gãanu kue ba ka man suura bɛriammɛ. 8A de bu kam ko subaru sɔɔ, bu wɔri ben suura ye sɔɔ, bu gbi. 9Kpa na n nuku dobu mɔ̀ wunɛn sɔ̃ Yinni Gusunɔ, faaba ye a man kuan sɔ̃. 10Kpa saa nɛn gɔ̃ru sɔɔn di, n nɛɛ, goo sari wi u dam mɔ nge wunɛ. Domi a nɛ wɔnwɔndo yara saa wi u man dam keren nɔman di. 11Wee, wee kowobu ba seewa ba man gari manimɔ yi na ǹ yɛ̃. 12Nà n bu gea kua, kɔ̃sa ba ra man kɔsie, kpa bu man deri nɛ turo. 13Adama sanam mɛ nɛn yibɛrɛ be, ba barɔ, na saakin yaberu sebua nuku sankirarun sɔ̃. Ma na tii tɔ̃ya mɔ̀ ka nɔɔ bɔkuru. Na ra n yiirewa na n kanaru mɔ̀, 14na n sãa nge ben kpaasi, ǹ kun mɛ nge ben mɛro bisi. Na nuki sankire nge wi u win mɛro bia. 15Adama be, ba ra mɛnnɛwa bu nuku dobu ko, sanam mɛ na sokura. Ba ra mɛnnɛwa nɛn biru bu ka man kɔ̃sa bwisikusi, kpa ba n man yaa kasikimɔ baadomma. 16Baa ka be ba ǹ Gusunɔ yɛ̃ ba man yɛ̃ɛmɔwa. Ba man kɔ̃rusi, ba nɔɔ dɔnnɛ gbam gbam. 17Yinni, sere domma kaa n yeniba mɛɛra. A ku de bu man wɔri, domi ba sãawa nge gbee sina kpɛnsu. 18Wuna kon siara mi wunɛn tɔmba mɛnnɛ, kpa n nun bɛɛrɛ wɛ̃ tɔn dabinun suunu sɔɔ. 19A ku de be ba sãa nɛn yibɛrɛba ba n man yɛ̃ɛmɔ kam sɔɔ, kpa be ba man tusa kam sɔɔ ba n man wɔmmɔ ka gɔnibu. 20Domi ben gari gerubu kun do. Kɔ̃sa ba ra n tɔmbu manimɔ, be ba wãa bɔri yɛndu sɔɔ tem mɛ sɔɔ. 21Ba ra n man nɔɔ gɛ̃ɛwa ba n mɔ̀, ba man wa. 22Yinni Gusunɔ, wuna a ye kpuro waamɔ. Yen sɔ̃, a ku nɔɔ mari, a ku maa ka man tonda. 23Gusunɔ, nɛn Yinni, a seewo a man siria. A ka man yinɔ. 24Gusunɔ nɛn Yinni, a sãawa gemgii, a man sirio, kpa bu ku raa maa nuku dobu ko nɛn sɔ̃, 25bu gere ben gɔ̃ruɔ bu nɛɛ, wee, ye ba kĩ, ya koora, ba man kamia. 26A de be, be ba nuku dobu mɔ̀ nɛn wahalan sɔ̃, be kpuro bu sekuru wa sannu sannu. A de be, be ba man seesimɔ, bu sekuru wa ta n kpã. 27Adama a de be ba nuku dobu mɔ nɛn taarɛ sarirun sɔ̃ bu yɛ̃ɛri, kpa ba n wunɛ Yinni Gusunɔ siaramɔ baadomma, wunɛ, wi a kĩ nɛ, wunɛn sɔm kowo na n wãa bɔri yɛndu sɔɔ. 28Yinni, na kon wunɛn gem gari kpara. Kon maa nun tɔma baadomma.

will be added

X\