Womusu 34

1Dafidi u tii gɔsia wiiro Abimɛlɛkin wuswaaɔ, yera durɔ wi, u nùn gira win min di. Saa yera Dafidi u womu geni kua u nɛɛ, 2na kon Yinni Gusunɔ siara saa baayere. Mɛya nɛn nɔɔ ga ǹ marimɔ na kun nùn tɔmɛ. 3Yinni Gusunɔ sɔɔra kon yɛ̃ɛri. Bɛɛ wɔnwɔndobu, i swaa dakio, kpa i gɔ̃ru dora. 4I ka man Yinni Gusunɔ wɔlle suo, su win yĩsiru bɛɛrɛ wɛ̃ sannu. 5Na Yinni Gusunɔ soka, ma u man wurari, u man yara nɛn bɛrum kpuron di. 6Be ba nùn wuswaa kisi, ba ra n nuku dobu mɔwa. Ba ǹ maa ben wuswaa wukirimɔ sekurun sɔ̃. 7Yinni Gusunɔ u ra wɔnwɔndon sokuru nɔ. Mɛya u ra maa nùn yare nuku sankiranu kpuron di. 8Win gɔrado u ra be ba nùn nasie kɔ̃su, kpa u bu yara karin di. 9I na, i win durom denda kpa i wa nge mɛ mu kpã. Doo nɔɔrugiiwa wi u kuku yeru kasu win mi. 10Bɛɛ be i sãa wigibu, i nùn nasio. Domi be ba nùn nasie, gãanu ku ra bu kɔmiɛ. 11Baa gbee sunɔ kpɛmu ga ra gasɔ bie gu di. Adama be ba Yinni Gusunɔ kasu, gãa geenu kun bu sararimɔ. 12Bɛɛ nɛn bibu, i susima i nɔ, kpa n bɛɛ sɔ̃ɔsi nge mɛ i ko ka Yinni Gusunɔ nasia. 13Wi u kĩ u wãaru di bɔri yɛndu sɔɔ, kpa u tɛ, 14u kɔ̃san gerubu de, kpa u weesu deri. 15U kɔ̃sa suurio, kpa u gea ko. U alafia naa giro. 16Gemgiba Yinni Gusunɔ u ra n nɔni wɛ̃ɛ. Mɛya u ra maa ben wuri swaa daki. 17Yinni Gusunɔ u ra ka kɔ̃san kowobu sannɛ, kpa u de bu ben gari duari tem mɛni sɔɔ. 18Yinni Gusunɔ u ra gemgibun sokuru wure, kpa u bu wuna ben wahala kpuron di. 19U ra n ka be ba nuki sankire wãa, kpa u be ba mwia kpana faaba ko. 20Kɔ̃sa dabina nu ra gemgii deemɛ, adama Yinni Gusunɔwa u ra nùn wɔre ye kpuron di. 21Wiya u win wasin gbin gbinka kɔ̃su. U ǹ derimɔ baa win kuku teeru tu kɔsira. 22Adama kɔ̃sa yà n tɔn kɔ̃so deema, ya ra nùn gowa. Mɛya u ra maa gemgiin yibɛrɛba sɛɛyasie. 23Wiya u ra win sɔm kowobun hunde wɔre karin di. Be ba maa nùn naanɛ sãa ba ǹ taarɛ wasi.

will be added

X\