Womusu 33

1Bɛɛ be i sãa gemgibu, i Gusunɔ siaro ka womusu. Bɛɛ be i dɛɛre, i nùn siaro baadomma. 2I nùn siaro ka mɔrɔkunu kpa i womusu ko ka gɔ̃ɔgenu. 3I nùn bɛɛrɛ wɛ̃ɛyɔ ka wom kpɔɔ, kpa i gãasu tora i ka nùn siara. 4Yinni Gusunɔ u ra gem gerewa. Ye u maa gerua kpuro ya ra koorewa mam mam. 5U ra ye ya wooda ka gem swĩi kã. Win durom mu yiba tem kpuro sɔɔ. 6Win nɔɔn gariya wɔlla ka taka koora, ka gãa ni nu wãa te sɔɔ kpuro. 7Ma u dera nim wɔ̃kun nim mu mɛnna yãatem. 8Bɛɛ handuniagibu, i Yinni Gusunɔ nasio. I diirio win wuswaaɔ. 9Domi ye u gerua kpuro, yera ya ra koore. Ù n wooda wɛ̃ kpa yu koora. 10Yinni Gusunɔ u ra bwesenun himba gɔsie, kpa yu kam ko mam mam. 11Adama win himba ya ku ra gɔsiare, ya ko n wãawa sere ka baadommaɔ. 12Bwese te ta Gusunɔ mɔ Yinni, ta ko n nuku dobu mɔwa. Mɛya bwese te u maa gɔsa win tiin sɔ̃ ta koo yɛ̃ɛriwa. 13Saa wɔllun diya Yinni Gusunɔ u tɔmbu kpuro mɛɛra. 14Saa win wãa yerun di, u handuniagibu kpuro mɛɛra. 15Wi, wi u tɔmbu kpuro bwisikunu wɛ̃, u maa ben kookoosu kpuron laakari mɔ. 16Sina boko ù n nasara wa tabu sɔɔ, n ǹ mɔ yèn sɔ̃ u tabu kowo dabiru mɔ. N ǹ maa tabu durɔn dam mu ra nùn yare win yibɛrɛn nɔman di. 17Wi u win naanɛ doke duma sɔɔ, u ǹ nasara wasi. Mɛya ka yen dam kpuro ya ǹ kpɛ̃ yu nùn wɔra karin di. 18Adama be ba Yinni Gusunɔ nasie, ma ba ben yĩiyɔbu doke win durom sɔɔ, beya u kɔ̃su, 19u ka ben hunde wɔra gɔɔn di, kpa ba n wasi baa gɔ̃ɔru tà n dua ben tem sɔɔ. 20Bɛsɛ, Yinni Gusunɔn miya bɛsɛn yĩiyɔbu wãa. Wiya u koo sun somi kpa u sun kɔ̃su nge tɛrɛru. 21Bɛsɛn gɔ̃ru ga do win sɔ̃. Sa maa nùn naanɛ sãa win dɛɛrarun sɔ̃. 22Yinni Gusunɔ, a de wunɛn durom mu n wãa ka bɛsɛ. Domi wunɛ sɔɔra bɛsɛn yĩiyɔbu wãa.

will be added

X\