Womusu 32

1Dafidin womu. Doo nɔɔrugiiwa wìn toranu ba suuru kua, ma ba win durum wuna. 2Doo nɔɔrugiiwa wìn kɔ̃sa Yinni Gusunɔ kun garisi, ma u ǹ maa keeta mɔ win gɔ̃ruɔ. 3Sanam mɛ na ǹ nɛn durum wure, nɛn kukunu gbisa, na weeweenu kua tɔ̃ɔ giriru, 4domi wunɛn nɔmu ga man sɛ̃re bururu ka yoka. Nɛn dam mu dɛlla nge mɛ dãa wurusu su ra ko sɔ̃ɔ sãrerun saa. 5Na nɛɛ, kon nɛn toranu wura wunɛ Yinni Gusunɔn mi. Na nɛn durum tuuba kua wunɛn mi, na ǹ nɛn kɔ̃sa berua. Ma a man nɛn durum taarɛ wunari. 6Yen sɔ̃, n weenɛ baawure wi u nun naanɛ sãa u nun kana wahalan saa sɔɔ. Baa nim bakam mù n yiba mu sara, mu ǹ yɛ̃ro turi. 7Wuna sãa nɛn kuku yeru, a ra man gbare wahalan di. A dera na womusu mɔ̀ wunɛn faaban sɔ̃. 8Yinni Gusunɔ, a nɛɛ, kaa man keu ko, kpa a man swaa sɔ̃ɔsi ye n weenɛ n swĩi. Kaa man bwisi kɛ̃, kpa a n man kɔ̃su. 9A maa nɛɛ, n ku ko bwisi sarirugii nge duma, ǹ kun mɛ nge birakɔ, yìn nɔɔwɔ ba ǹ koo ko ba kun yaruka ka karabasuuru doke, ba n ka yi gawe, kpa yi ku raa tɔnu wɔri. 10Tɔn kɔ̃sobun wahala kpã, adama wi u Yinni Gusunɔ naanɛ sãa, win durom mu ra n yɛ̃ro wãasiwa. 11Yen sɔ̃, bɛɛ gemgibu, i gɔ̃ru doro Yinni Gusunɔ sɔɔ, kpa i dɛsinu kara. Bɛɛ bèn gɔ̃ru ga dɛɛre, i guuda koowo ka nuku dobu, bɛɛ kpuro.

will be added

X\