Womusu 31

1Womu ge Dafidi u wom kowobun wirugii kua. U nɛɛ, 2Yinni Gusunɔ, wuna a sãa nɛn kuku yeru. A ku de n sekuru wa. A man wɔro domi wuna a sãa gemgii. 3A man swaa dakio. A man wɔro fuuku. A de a n sãa nɛn kpee baa ka nɛn gbãraru mi kon kpĩ n kuke, kpa n ka faaba wa. 4A man kparo kpa bu wa ma a naanɛ mɔ, kpa na n kukua wunɛn mi. 5Mɛya kaa man yara saa taa ye ba man bɛrien di, domi wuna a man kɔ̃su. 6Na nun nɛn wãaru nɔmu sɔndia, domi wuna a man wɔra Yinni Gusunɔ, wunɛ wi a naanɛ mɔ. 7Na be ba bũnu sãamɔ tusa, ma na nun naanɛ sãa. 8Ko na n wãawa nuku dobu sɔɔ wunɛn durom saabu, domi a nɛn nɔni swãaru yɛ̃. Mɛya a maa yɛ̃ nge mɛ na nuki sankire. 9A man wɔra yibɛrɛban nɔman di. Wee a dera na tii mɔ. 10Yinni Gusunɔ, a man durom kuo. Domi na wãa nuku sankiraru sɔɔ. Nuku sankira te, ta dera nɛn bwɛ̃ra ka nɛn wuswaa ka nɛn wasi kpuro burisinɛ. 11Wahala ya man goomɔ, ma weeweenu dera na tɔkɔ mɔ̀. Nɛn dam mu doonɔ nɛn torarun sɔ̃, ma nɛn gɔma dwiiyamɔ. 12Nɛn yibɛrɛba ba man sekuru doke, ma be ba sãa nɛgibu ba tu sosimɔ. Be ba man yɛ̃, beya ba nɛn bɛrum mɔ̀. Bà n ka man yinna swaaɔ, ba ra duki suwa. 13Tɔmba man duari nge wi u gu. Na sãawa nge gãa ni ba kɔ̃. 14Na nɔɔmɔ kɔ̃sa ye tɔmba gerumɔ nɛn sɔ̃. Ma be ba man sikerenɛ kpuron bɛrum man mɔ̀. Domi ba wesianamɔ bu ka man go. 15Adama Yinni Gusunɔ, wuna na naanɛ sãa. Domi wuna a sãa nɛn Yinni. 16Nɛn sian wãaru kpuro wunɛn nɔmu sɔɔra ta wãa. A man wɔro saa nɛn yibɛrɛba ka be ba man nɔni sɔ̃ɔmɔn nɔman di. 17A man wunɛn yam bururam sɔ̃ɔsio. A man wɔro wunɛn durom sɔ̃. 18Yinni Gusunɔ, nà n nun soka, a ku de n sekuru wa. Adama a de tɔn kɔ̃so u sekuru wa, kpa u da gɔribun wãa yerɔ gɔɔ u nùn nɔɔ marisia. 19A ku de wee kowobu bu gari gere, ka be ba tii sua gari mɔ̀, ba gabu gɛma. 20Yinni Gusunɔ, wunɛn durom mu kpã, mɛ a be ba nun nasie yiiye, ka be ba ben naanɛ doke wunɛ sɔɔ. Tɔmbu ba koo kpĩ bu wa durom mɛ a ra bu kue. 21Domi a ra be ba nun nasie kɔ̃su, kpa ba n wãa wunɛn wuswaaɔ bu ku ka du naanaanu sɔɔ, kpa a bu bere wunɛn dirɔ tɔn kɔ̃sobun sɔ̃. 22Yinni Gusunɔ, wuna kon siara, domi a man wunɛn durom sɔ̃ɔsi. Na raa sãawa nge wuu ge ba tarusi, 23sere nɛn laakari ya burisina, na nɛɛ, wee a man gira wunɛn wuswaan di. Adama a nɛn weeweenu nua sanam mɛ na nɔɔgiru sua na nun soka. 24Yen sɔ̃, i Yinni Gusunɔ kĩɔ, bɛɛ be i nùn naanɛ sãa. Domi u be ba nùn naanɛ doke kɔ̃su. Adama u ra be ba tii sue sɛɛyasie ka dam. 25Bɛɛ be i yĩiyɔbu mɔ Yinni Gusunɔn mi, i nukuru doro, kpa i de bɛɛn bwɛ̃ra yu wurama.

will be added

X\