1 Womu ge Dafidi u kua bu ka Yinni Gusunɔn sãa yeru wukia. U nɛɛ, 2 Yinni Gusunɔ, kon wunɛn kpãaru kpara. Domi a man yara saa wɔrun di. A ǹ maa dere nɛn yibɛrɛba bu man yɛ̃ɛ. 3 Gusunɔ nɛn Yinni, na nun nɔɔgiru sue na faaba kana, ma a man bɛkia. 4 A man wɔra gɔɔn nɔman di, ma a dera sa tondinɛ ka be ba gu. 5 I Yinni Gusunɔ siaro ka womusu, bɛɛ be i ka nùn yɔ̃ dim dim. I win yĩsi dɛɛra te wɔlle suo. 6 Domi win mɔru ku ra tɛ. Adama u ra tɔnu durom kuewa win wãaru kpuro sɔɔ. Nuku sankiranu nù n nùn deema yoka, sisiru bururu, u ra deemɛ nuku doo bakaba. 7 Na raa nɛɛ, nɛn nuku doo bini sɔɔ, na ǹ sokuramɔ pai. 8 Yinni Gusunɔ, wunɛn saabuwa na ka wãa bɔri yɛndu sɔɔ nge wi u kukua kpee baa sɔɔ. Adama ye a wunɛn wuswaa berua, nɛn laakari ya burisina. 9 Yen biruwa na nɔɔgiru sua na nun somiru kana. 10 Na nɛɛ, mba kaa wa à n man go, a man doke siki wɔruɔ. Nà n gɔsira tua, kon kpĩ n nun sã? Kon kpĩ n wunɛn gem gari kpara? 11 Yinni Gusunɔ, a man swaa dakio, kpa a man durom kua. Yinni, a man somiɔ. 12 Wee tɛ̃, nɛn nuku sankiraru ta kua nuku dobu. A nɛn saaki ye na wukiri nuku sankirarun sɔ̃ wuna. Ma a man tɔ̃ɔ baka yãnu sebusia n ka nuku dobu ko. 13 Nɛn bwɛ̃ra ya koo nun bɛɛrɛ wɛ̃ ka womusu, na ǹ nɔɔ marimɔ. Gusunɔ nɛn Yinni, wuna kon siara sere ka baadommaɔ.
