Womusu 28

1Dafidin womu. Yinni Gusunɔ, wuna na wuri koosimɔ. Wunɛ wi a sãa nge nɛn kpee baa mi na ra kuke, a ku man duari. Domi à n maari mɛsum, ko na n sãawa nge wi u gɔɔ dɔɔ. 2Nà n nɔma yiiya na kanaru mɔ̀ sãa yee dɛɛra ten mi, a nɛn kanaru swaa dakio. 3A ku man garisi tia ka tɔn kɔ̃sobu, ka be ba maa ka ben winsim gari mɔ̀ nge kĩru, adama ben gɔ̃ruɔ kɔ̃sa ya yiba. 4A bu ben kookoosun are wɛ̃ɛyɔ nge mɛ yi nɛ. Ye ba gabu kua, a de yu wɔri ben wirɔ. 5Domi ba ǹ gara ye wunɛ Gusunɔ a mɔ̀. Yen sɔ̃, a bu kɔsukuo kpa bu ku raa maa se. 6Yinni Gusunɔ, wuna kon siara, domi a ra nɛn kanaru nɔ. 7Wuna a man ganua nge tɛrɛru, a sãawa nɛn dam. Wunɛ sɔɔra nɛn naanɛ wãa, domi a man faaba kua. Ma na nuku dobu mɔ, na nun siaramɔ ka womusu. 8Yinni Gusunɔ, a sãawa wunɛn tɔmbun dam. Domi a sãawa nge kàrì, a ka wi a gɔsa faaba ko. 9A wunɛn tɔmbu faaba koowo kpa a bu domaru kua, be, be ba sãa wunɛn arumani. A bu kparo kpa a bu nɔɔri sere ka baadommaɔ.

will be added

X\